नवी मुंबई : सार्वजनिक गणेशोत्सवानिमित्त मुख्यमंत्री एकनाथ शिंदे यांच्या अध्यक्षतेखाली झालेल्या विशेष बैठकीत गणेशोत्सव मंडळांना अनामत रक्कम आणि मंडपशुल्क माफ करावेत, अशा सूचना देण्यात आल्या होत्या. या निर्देशांनुसार, नवी मुंबई महापालिका हद्दीतील सार्वजनिक गणेशोत्सव मंडळांनाही मंडपशुल्क आणि अनामत रक्कम माफ करण्यात येत असल्याचे पालिका आयुक्त राजेश नार्वेकर यांनी जाहीर केले आहे.नवी मुंबई महानगरपालिकेने मंडप उभारण्याची परवानगी देण्याची ‘ई-सेवा संगणक प्रणाली’ सुरू केली असून १९ ऑगस्टपासून मंडळांनी ऑनलाइन अर्ज दाखल करण्यास सुरुवात केली आहे. त्यानुसार सर्व गणेशोत्सव मंडळांनी आवश्यक परवानगी प्राप्त करून घ्यावयाची असून त्यासाठी कोणतेही शुल्क आकारण्यात येणार नाही, तथापि परवानगी घेणे आवश्यक आहे, याची नोंद घेण्यात यावी. गणेशोत्सवाच्या दहा दिवस अगोदरपर्यंतच ऑनलाइन परवानगी प्रणाली सुरू राहील, याची मंडळांनी नोंद घ्यावयाची आहे. मंडप उभारणी परवानगीचा अर्ज महानगरपालिकेच्या संबंधित विभाग कार्यालयाकडे www.rtsnmmconline.com या वेबसाइटवर ऑनलाइन सादर करावयाचा आहे, असे आवाहन महापालिका आयुक्तांच्या वतीने करण्यात आले आहे.
