म. टा. प्रतिनिधी, मुंबई: कुलाबा येथील एका महिलेने बाळाला मुदतपूर्व जन्म दिला होता. या बाळाचे वजन अवघे ८०० ग्रॅम असल्याने त्याला नवजात शिशू अतिदक्षता विभागात दाखल करण्यात आले होते. तब्बल ११० दिवसांच्या उपचारांअंती त्याचे वजन एक किलो ८१६ ग्रॅम झाल्यानंतर त्याला घरी सोडण्यात आले. त्यामुळे आपत्यप्राप्तीचा आनंद साजरा करण्यासाठी या कुटुंबाला इतके दिवस वाट पाहावी लागली. कुलाबा येथील आर.सी. चर्च परिसरात राहणाऱ्या ज्योती दिनेश दुबे यांना गर्भाशयातील गर्भाची वाढ आणि गर्भाला होणारा कमी रक्तपुरवठा यामुळे २ मे रोजी कामा रुग्णालयात दाखल केले. उपचार सुरू असताना १३ मे रोजी मुदतपूर्व प्रसूती होऊन त्यांनी मुलीला जन्म दिला. या बाळाचे वजन अतिशय कमी म्हणजे ८०० ग्रॅम होते व वाढही झाली होती. त्यामुळे त्याला नवजात शिशू अतिदक्षता विभागाच्या प्रमुख डॉ. श्रुती ढाले यांच्या देखरेखीखाली ठेवण्यात आले. बाळाला होणारा जंतूसंसर्ग टाळण्यासाठी प्रतिजैवके देण्यात आली. १३ दिवस जीवरक्षक प्रणालीवर ठेवल्यानंतर त्याची प्रकृती स्थिर झाली. आईला दूध कमी येत असल्याने ह्युमनमिल्क बँकेतील दूध नळीवाटे देण्यासह कांगारू मदत केअरसह नेस्टिंग पद्धतीचा वापर करून बाळाचे वजन वाढवण्यावर भर देण्यात आला. अखेरीस वजन वाढल्यानंतर ३० तारखेला या बाळाला पालकांसोबत सुखरूप पाठवण्यात आल्याची माहिती रुग्णालय प्रशासनाने दिली.
