म. टा. विशेष प्रतिनिधी, नाशिक : विधानसभा अध्यक्ष राहुल नार्वेकर यांनी मुख्यमंत्री एकनाथ शिंदे यांच्यासह १६ आमदारांना पात्र ठरवत खरी शिवसेना शिंदेचीच असल्याचा निकाल दिल्यानंतर नाशिकमध्ये मायको सर्कलवरील शिंदे गटाच्या कार्यालयात जल्लोष करण्यात आला. आतषबाजी आणि एकमेकांना पेढे भरवत ढोलताशांच्या गजरात पालकमंत्री दादा भुसे व जिल्हाध्यक्ष अजय बोरस्ते यांच्या उपस्थितीत शिंदे गटाच्या पदाधिकाऱ्यांनी ठेका धरला. या निकालामुळे उद्धव बाळासाहेब ठाकरे गटाच्या शालिमार कार्यालयात शांतात पहायला मिळाली. ठाकरे गटाने या निकालाचा निषेध केला.राहुल नार्वेकर यांच्याकडून निकालपत्राचे वाचन सुरू असताना मायको सर्कल येथील शिंदे गटाच्या मध्यवर्ती कार्यालयात पालकमंत्री दादा भुसे, खासदार हेमंत गोडसे, सहसंपर्कप्रमुख राजू अण्णा लवटे, जिल्हाप्रमुख अजय बोरस्ते, आदी पदाधिकाऱ्यांच्या नजरा टीव्हीवर खिळून होत्या. नार्वेकर यांनी मूळ शिवसेना म्हणून शिंदे गटाला मान्यता देताच शिंदे गटाच्या सर्वच कार्यकर्त्यांनी विजयाच्या घोषणा दिल्या. पालकमंत्री भुसे, जिल्हाप्रमुख बोरस्ते यांनी कार्यकर्त्यांबरोबर सहभागी होत ठेका धरला. एकमेकांना पेढे भरवत शुभेच्छा दिल्या. पालकमंत्री भुसे यांच्यासह शिंदे गटाच्या सर्व प्रमुख पदाधिकाऱ्यांनी पंचवटीतील काळाराम मंदिरात आरती केली.प्रभू श्रीरामचंद्राच्या आशीर्वादाने शिवसेनाप्रमुख बाळासाहेब ठाकरे यांच्या विचारांचा आज विजय झाला. शिवसेनेला कौल देऊन महाराष्ट्रातील जनतेला विधानसभा अध्यक्ष राहुल नार्वेकर यांनी न्याय दिला. वस्तू स्थितीला धरून दिलेल्या न्यायाचे आम्ही स्वागत करतो.- दादा भुसे पालकमंत्री, नाशिकशिवसेनाप्रमुख बाळासाहेब ठाकरे यांच्या विचारांचा विजय झाला आहे. खऱ्या अर्थाने विधानसभा अध्यक्षांनी न्यायनिवाडा केला. यात सामान्य शिवसैनिकांचा विजय झाला आहे. काँग्रेस व राष्ट्रवादी काँग्रेसकडे गहाण ठेवलेली शिवसेना आज अनधिकृत झाली आहे.- अजय बोरस्ते, जिल्हाप्रमुख, शिवसेना, शिंदे गट.सुप्रीम कोर्टाने कानपिचक्या दिल्यानंतरही राहुल नार्वेकर यांनी या विषयात वेळकाढूपणा केला. हा निकाल लोकशाहीला घातक आणि चुकीची प्रथा पाडणारा आहे. पक्षांतर बंदी कायद्याला थेट पायमल्ली करणारा आहे. जनता त्यांना मतपेटीतून धडा शिकवेल यात शंका नाही.- सुधाकर बडगुजर, शिवसेना महानगरप्रमुख (ठाकरे गट)१६ आमदारांच्या अपात्रतेच्या संबंधित आज दिलेला विधानसभा अध्यक्षांचा निकाल अत्यंत दुर्दैवी आहे. सर्वोच्च न्यायालयाने काढलेले निष्कर्ष आणि आजचा निकाल हा अत्यंत मोठा विरोधाभास आहे. सार्वत्रिक निवडणुकीच्या माध्यमातून अशा प्रवृत्तींना जनता धडा शिकवल्याशिवाय राहणार नाही.- आकाश छाजेड, अध्यक्ष, नाशिक शहर (जिल्हा) काँग्रेस कमिटी
