वृत्तसंस्था, नवी दिल्ली: बिहारमधील सत्ताधारी संयुक्त जनता दलाने (जदयू) अरुणाचल प्रदेशमध्ये लढविण्याची तयारी सुरू केली आहे. या राज्यातील अरुणाचल पश्चिम मतदारसंघातून ‘जदयू’ने उमेदवार जाहीर केला आहे.काँगेसच्या पुढाकाराने भाजपविरोधात तयार करण्यात आलेल्या इंडिया आघाडीमध्ये ‘जदयू’ घटकपक्ष आहे. मात्र, या आघाडीत सारे काही ठीक नसल्याचे बुधवारी स्पष्ट झाले. अरुणाचलमध्ये लोकसभेच्या दोन जागा आहेत. तेथे २०१९ च्या निवडणुकीत काँग्रेसची भाजपविरोधात थेट लढत झाली होती. या दोन्ही जागा भाजपने जिंकल्या; मात्र काँग्रेस दुसऱ्या स्थानी राहिला होता. आता अरुणाचल पश्चिम मतदारसंघातून ‘जदयू’ने प्रदेशाध्यक्ष रुही तंगुंग यांना उमेदवारी दिली आहे. पक्षाचे सरचिटणीस अफाकी अहमद यांनीच याबाबत घोषणा केली. ‘जदयू’चे पक्षाध्यक्ष यांच्या सूचनेनुसार रोही यांच्या नावावर शिक्कामोर्तब झाल्याचे अहमद यांनी स्पष्ट केले.बिहारचे मुख्यमंत्री असलेल्या नितीशकुमार हे नुकतीच ‘जदयू’चे पक्षाध्यक्ष झाले आहेत. इंडिया आघाडीमध्ये महत्त्वपूर्ण भूमिका मिळत नसल्याने नितीशकुमार नाराज असल्याच्या चर्चा आहे. त्यात अरुणाचलमध्ये लोकसभेसाठीचा उमेदवार परपस्पर जाहीर केल्याने इंडिया आघाडीला अनपेक्षित धक्का बसल्याचे मानले जात आहे.
