मुंबई: महाराष्ट्रात सत्तास्थापनेच्या प्रयत्नांच्या दिशेने आता वेगाने घडामोडी घडू लागल्या आहेत. आज सकाळी शिवसेना नेते दिवाकर रावते यांनी राजभवनात येऊन राज्यपाल भगत सिंह कोश्यारी यांची भेट घेतली आणि सर्वांच्या भुवया उंचावल्या. कारण त्यानंतर थोड्याच वेळात मुख्यमंत्री देवेंद्र फडणवीसदेखील राजभवनात पोहोचणार होते. दोघेही वेगवेगळ्या वेळी राजभवनात जाणार असल्याने चर्चांना ऊत आला होता. दिवाकर रावते राज्यपालांना भेटून बाहेर येताच प्रसारमाध्यमांच्या प्रतिनिधींनी त्यांना गराडा घातला. मात्र आपण राज्यपालांना दिवाळीच्या शुभेच्छा देण्यासाठी आलो होतो, असं त्यांनी सांगितले. ते म्हणाले, 'मी मुंबईचा महापौर होतो तेव्हापासून म्हणजे १९९३ पासून हा दिवाळीचा शिरस्ता पाळतोय. दरवर्षी पाडव्यादिवशी मी राज्यपालांना भेटून दिवाळीच्या शुभेच्छा देत असतो. ' दरम्यान, राज्यात सरकारस्थापनेचा दावा करण्यासाठी मुख्यमंत्री देवेंद्र फडणवीस हे आज राज्यपालांची भेट घेणार आहेत. अपक्षांचा पाठिंबा जागावाटपानंतर आता भाजप व शिवसेनेतच आकड्यांची शर्यत सुरू झाली आहे. सामर्थ्य दाखवण्यासाठी शिवसेनेने अपक्ष आमदारांचा पाठिंबा मिळवण्यास सुरुवात केली आहे. याद्वारेच बच्चू कडू, राजकुमार पटेल, आशिष जयस्वाल व नरेंद्र गोंडेकर यांनी शिवसेनेला पाठिंबा दिला आहे. तर, भाजपनेही राष्ट्रीय स्वयंसेवक संघाच्या मुशीतून घडलेल्या आमदारांना आपल्याकडे वळवण्याचा प्रयत्न सुरू केला आहे. संख्याबळ नव्या विधानसभेतील राजकीय पक्षाचे संख्याबळ पुढीलप्रमाणे. भाजप १०५, शिवसेना ५६, राष्ट्रवादी काँग्रेस ५४, काँग्रेस ४४, बहुजन विकास आघाडी ३, एमआयएम २, समाजवादी पार्टी २, प्रहार जनशक्ती पार्टी २, माकप १, जनसुराज्य शक्ती १, क्रांतिकारी शेतकरी पार्टी १, महाराष्ट्र नवनिर्माण सेना १, राष्ट्रीय समाज पक्ष १, स्वाभिमानी शेतकरी संघटना १, शेकाप १, अपक्ष १३. एकूण जागा २८८.
