कोची (केरळ): भूमाता ब्रिगेडच्या नेत्या, सामाजिक कार्यकर्त्या आज शबरीमला मंदिरात प्रवेश करण्याचा प्रयत्न करणार असून प्रवेशासाठी त्या कोचीहून निघाल्या असल्याचे वृत्त आहे. दरम्यान त्यांना कोणत्याही परिस्थितीत शबरीमला मंदिरात प्रवेश द्यायचा नाही याची तयारी आंदोलकांनी केली आहे. देसाई यांचे आज पहाटे कोची विमानतळावर आगमन झाल्यानंतर त्या कारने शबरीमला मंदिराकडे रवाना झाल्या. त्यांच्यासोबत बिंदू अम्मिनी या कार्यकर्त्याही आहेत. बिंदू यांनी गेल्यावर्षी मंदिरप्रवेशाचा प्रयत्न केला होता. कोची विमानतळाहून निघालेल्या तृप्ती देसाई या तीन तासांमध्ये शबरीमला मंदिराजवळ पोहचतील असे सांगण्यात येत आहे. दरम्यान, कोणत्याही वयोगटातील स्त्री शबरीमला मंदिरात प्रवेश करू शकते असा निर्णय सुप्रीम कोर्टाने गेल्यावर्षी दिला असून त्यावर स्थगिती आलेली नाही, असे देसाई यांचे म्हणणे आहे. आज संविधान दिन असून ही स्त्रीविरोधी परंपरा मोडीत काढण्यासाठी आजचा दिवस हा आदर्श दिवस असल्याचेही देसाई यांनी म्हटले आहे. जर कुणी आम्हाला अडवण्याचा प्रयत्न केला तर सुप्रीम कोर्टाचा अवमान झाल्याप्रकरणी आम्ही कोर्टात दाद मागू, असेही त्या म्हणाल्या. माझ्या मंदिरप्रवेशाची माहिती मी केरळ राज्याचे मुख्यमंत्री आणि पोलीस महासंचालकांना दिलेली असल्याचेही त्या म्हणाल्या. आम्हाला संरक्षण पुरवणे ही त्यांची जबाबदारी असल्याचे देसाई म्हणाल्या. अजूनही देसाई यांना पोलिसांनी संरक्षण पुरवले नसले, तरी देखील आमचे त्यांच्या प्रवासावर पूर्ण लक्ष असल्याचे पोलिसांनी सांगितले. मात्र आम्हाला कोर्टाकडून आदेश आल्याखेरीज आम्ही परंपरेने प्रतिबंधित केलेल्या वयोगटातील स्त्रियांना संरक्षण देऊ शकणार नाही, असे केरळ सरकारने म्हटले आहे. 'मंदिरप्रवेश नाकारल्यास उपोषण करणार' आपल्याला मंदिरात प्रवेश करू दिला गेला नाही, तर आपण उपोषण करत याचा निषेध करू असे देसाई यांनी स्पष्ट केले आहे. शिवाय आपल्याला प्रवेश का नाकारण्यात आला याबाबत पोलिसांना लेखी स्वरुपात त्यांची भूमिका स्पष्ट करण्यास भाग पाडू असेही देसाई म्हणाल्या. दरम्यान, शबरीमला मंदिराभोवती विरोधकांनी कोणत्याही प्रकारचे आंदोलन करण्याचे निश्चित केले नसले तरी, शबरीमला कर्म समितीने देसाई यांना प्रवेशापासून रोखण्याची योजना आखली असल्याचे वृत्त प्रसिद्ध झाले आहे. तृप्ती देसाई यांच्या गाड्यांच्या ताफ्यावर पोलीस नजर ठेवून असून ते देसाईंना मंदिर प्रवेश करू देणार नाहीत असे समजते.
