नवी दिल्ली: इंद्रप्रस्थ इन्स्टिट्यूट ऑफ इन्फॉर्मेशन टेक्नॉलॉजीमधील (आयआयटी) एका मुलाची लॉटरीच लागली. त्याला फेसबुकने (यूएस) १.४५ कोटींहून अधिक पगाराच्या नोकरीची ऑफर दिली आहे. हे वार्षिक पॅकेज कॉम्प्युटर सायन्सच्या विद्यार्थ्याला दिले आहे. दिल्ली सरकारच्या या शैक्षणिक संस्थेची ही आतापर्यंतची विक्रमी प्लेसमेंट आहे. याव्यतिरिक्त आणखी दोन विद्यार्थ्यांना ४३ लाख रुपये आणि ३३ लाख रुपयांच्या पॅकेजची ऑफर दिली आहे. यावेळी २०२० मध्ये पदवीपर्यंतचं शिक्षण पूर्ण करणाऱ्या विद्यार्थ्यांना ३१० नोकऱ्यांच्या ऑफर्स मिळाल्या आहेत. विद्यार्थ्यांना इंटर्नशीपच्या २५२ ऑफर्स मिळाल्या आहेत. दिल्ली सरकारच्या आयआयटीच्या विद्यार्थ्यांचे आतापर्यंतचे सरासरी पॅकेज १६.३३ लाख रुपयांचे होते. यात युजी (पदवीपूर्व) आणि पीजी (पदव्युत्तर) अभ्यासक्रमांचा समावेश आहे. हारमन कारडॉन कंपनीने वार्षिक १५ लाख पॅकेजवर ७ विद्यार्थ्यांची निवड केली आहे. इन्स्टिट्यूटच्या अधिकाऱ्यांना सांगितले की डिसेंबरमध्ये प्लेसमेंटचा दुसरा टप्पा सुरू होईल. त्यावेळी आणखी जास्त आंतरराष्ट्रीय आणि राष्ट्रीय नोकऱ्यांच्या ऑफर्स विद्यार्थ्यांना येण्याची शक्यता आहे. कॅम्पस प्लेसमेंटसाठी येणाऱ्या कंपन्यांमध्ये गुगल, मायक्रोसॉफ्ट, अॅमेझॉन, , क्वालकॉम, सॅमसंग, रिलायन्स, डब्ल्युडीसी, टॉवर रिसर्च, एनविडिया, एडोबी, गोल्डमॅन सॅश आदी कंपन्यांचा समावेश आहे. याव्यतिरिक्त इन्स्टिट्यूटच्या २०२१ मध्ये ग्रॅज्युएशन पूर्ण करणाऱ्या बीटेक बॅचसाठी १०८ इंटर्नशीप ऑफर आल्या आहेत. इंटर्नशीप देणाऱ्या कंपन्यांमध्ये नेटअॅप, एनविडिया, टॉवर रिसर्च, गुगल, फेसबुक, अॅमेझॉन, एडोबी यांचा समावेश आहे. एका बीटेक सीएसई २०२१ बॅचच्या विद्यार्थ्याला फेसबुक-लंडनकडून ३.३१ लाख रुपयांच्या स्टायपेंडसह इंटर्नशीपची ऑफर मिळाली आहे.
