मुंबई राज्यात सत्तास्थापनेचा तिढा अद्याप सुटलेला नसून भाजप-शिवसेना युतीमध्येच संख्याबळाची शर्यत गेल्या काही दिवसांपासून सुरू आहे. शिवसेनेत आता आणखी एका अपक्ष आमदाराची भर पडली असून सेनेचे संख्याबळ ६४ इतके झाले आहे. कोल्हापूरच्या शिरोळ मतदार संघातील अपक्ष आमदार राजेंद्र पाटील यद्रावकर यांनी सोमवारी रात्री शिवसेना पक्षप्रमुख उद्धव ठाकरे यांची 'मातोश्री'वर भेट घेऊन शिवसेनेला आपला पाठिंबा दर्शवला. यावेळी शिवसेनेचे गटनेते एकनाथ शिंदे देखील उपस्थित होते. यापुढील काळात शिवसेनेच्या माध्यमातून कोल्हापूर जिल्ह्यातील सर्व प्रलंबित प्रश्न मार्गी लावणार असल्याचं यावेळी राजेंद्र पाटील यद्रावकर यांनी सांगितलं. याशिवाय, राज्यातील शेतकऱ्यांना, कामगारांना न्याय, गोरगरीब रुग्णांना वैद्यकीय सेवा आणि बेरोजगार युवकांना रोजगार शिवसेनाच मिळवून देऊ शकते हा विश्वास असल्यानेच शिवसेनेला पाठिंबा देत असल्याचंही पाटील म्हणाले.
