मुंबई- बॉलिवूडच्या दिग्गज अभिनेत्री शर्मिला टागोर यांनी नुकताच त्यांचा वाढदिवस साजरा केला. त्यांचा वाढदिवस साजरा करण्यासाठी संपूर्ण पतौडी कुटूंब एकत्र आलं होतं. वाढदिवसानंतर शर्मिला टागोर यांनी एक रेडिओ चॅट शोला मुलाखत दिली. विशेष म्हणजे सून करिना कपूर खानच हा शो होस्ट करत होती. यावेळी करिनाने शर्मिला यांना अनेक रंजक प्रश्न विचारले. तैमूर, इनाया, सारा आणि इब्राहिममध्ये त्यांना कोण सर्वाधिक आवडतं असा प्रश्न करिनाने शर्मिला यांना विचारला. शर्मिला यांनी या प्रश्नावर फार भन्नाट उत्तर दिलं. त्या म्हणाल्या की, 'सगळीच नातवंड एकमेकांपेक्षा वेगळी आहेत आणि हे माझं भाग्य आहे की मला दोन तरुण आणि दोन लहान नातवंड आहेत.' याबद्दल बोलताना शर्मिला पुढे म्हणाल्या की, 'मी साराच्या सगळ्या मुलाखती पाहते. मला तिचा अभिमान आहे. नातवंडांमध्ये फक्त इब्राहिमच असा आहे जो पतौडी घराण्यातील सदस्य वाटतो. तो फार उंच आहे आणि त्याला क्रिकेट खेळायलाही आवडतं.' यावेळी करिनाने आपल्या सासूला मुलगी आणि सूनेतलं अंतर काय असतं असा प्रश्न विचारला. याचं उत्तर देताना शर्मिला म्हणाल्या की, 'मुलीचा स्वभाव तुम्हाला माहीत असतो. तिला काय आवडतं काय नाही याबद्दल तुम्हाला पूर्ण जाणीव असते. सूना या आधीपासूनच समजूतदार असतात. तुम्हाला त्यांची आवड- निवड माहीत नसते. त्यामुळे त्यांच्यासोबत जुळवून घेण्यात थोडा वेळ लागतो. तसेच सून जेव्हा तिच्या घरातून तुमच्या घरात येते तेव्हा तिचं खुल्या मनानं स्वागत करणं आपली जबाबदारी असते.' क्रिकेटर मन्सूर अली खान पतौडींशी लग्न आणि इतक्या वर्षांच्या संसाराबद्दल बोलता शर्मिला म्हणाल्या की त्या बंगाली असल्यामुळे भात खाणं त्यांना आवडतं. पण पतौडी कुटुंबात रोटी- फुलका खाण्याला प्राधान्य दिलं जायचं. याशिवाय शर्मिला यांना मासे खाणं प्रचंड आवडायचं पण पतौडींना मासे अजिबातच आवडायचे नाहीत.
