नवी दिल्ली: भारतीय वेबसाइट हॅक होण्याच्या घटना वाढीस लागल्या आहेत. या वर्षात ऑक्टोबरपर्यंत २१ हजार ४०० हून अधिक वेबसाइट हॅक झाली असल्याची माहिती माहिती व तंत्रज्ञान राज्यमंत्री संजय धोत्रे यांनी संसदेला दिली. भारताच्या सायबर स्पेसवर हल्ला करण्याचे प्रयत्न झाले असल्याचे त्यांनी सांगतिले. लोकसभेला दिलेल्या एका लिखित उत्तरात त्यांनी ही माहिती दिली. इंडियन कॉम्प्युटर एमर्जन्सी रिस्पॉन्स टी (CERT-In)कडे असलेल्या माहितीनुसार, २०१६ मध्ये ३३१४७, २०१७ मध्ये ३००६७, २०१८ मध्ये १७५६० आणि २०१९ (ऑक्टोबरपर्यंत) २१४६७ भारतीय वेबसाइट हॅक करण्यात आल्या घटना समोर आल्या आहेत. सायबर हल्लेखोरांनी फक्त भारतच नव्हे तर जगभरातील वेबसाइटसोबत छेडछाड केली आहे. सायबर हल्लेखोरांचे लोकेशन चीन, पाकिस्तान, नेदरलँड, फ्रान्स, तैवान, ट्युनिशिया, रशिया, अल्जेरिया आणि सर्बिया या देशातील असल्याची माहिती समोर आली आहे. माहिती तंत्रज्ञान कायद्यातील कलम ६९ एनुसार माहिती आयटी मंत्रालयाकडे २०१८ मध्ये युआरएल ब्लॉक करण्याबाबतच्या ४१९२ तक्रारी दाखल झाल्या. तर, २०१९ मध्ये ऑगस्टपर्यंत ३८४७ पर्यंत तक्रारी दाखल झाल्या असल्याची माहिती धोत्रे यांनी दिली.
