नवी दिल्ली: तुमच्याकडे ड्रोन असेल तर, त्याची ३१ जानेवारीपर्यंत नोंदणी करावी लागणार आहे. तशा सूचना केंद्रीय नागरी उड्डाण मंत्रालयानं दिल्या आहेत. जर नियमांचं उल्लंघन केलं आणि ३१ जानेवारीपर्यंत नोंदणी केली नाही तर, संबंधितांविरोधात कारवाई केली जाईल. प्रसंगी तुरुंगातही जावे लागेल. केंद्रीय नागरी उड्डाण मंत्रालयानं ज्यांच्याकडे ड्रोन आहेत, त्यांना त्याच्या नोंदणीसाठी ३१ जानेवारीपर्यंतची मुदत दिली आहे. नियमांचं उल्लंघन केलं आणि ३१ जानेवारीपर्यंत नोंदणी केली नाही तर, संबंधितांविरोधात कायदेशीर कारवाई करण्यात येणार आहे. नोंदणी प्रक्रिया १४ जानेवारीपासून सुरू होणार आहे. अमेरिकेनं इराणवर ड्रोन हल्ला केल्यानंतर नागरी उड्डाण मंत्रालयानं हे पाऊल उचललं आहे. यासंदर्भात मंत्रालयाकडून एक परिपत्रकही काढण्यात आले आहे. ड्रोन जवळ बाळगणाऱ्या व्यक्ती किंवा संचालक आहेत, त्यांच्याकडून नागरी हवाई नियमावलीचं पालन केलं जात नसल्याची बाब सरकारच्या निदर्शनास आली आहे. ड्रोन उडवणाऱ्या व्यक्ती आणि संचालकांना स्वतःहून त्याची माहिती जाहीर करण्याची संधी देण्यात येत आहे. ड्रोन बाळगणाऱ्या प्रत्येक व्यक्तीला ३१ जानेवारी २०२०पर्यंत ऑनलाइन नोंदणी प्रक्रिया पूर्ण करावी लागेल, असं या नोटिशीत नमूद करण्यात आलं आहे. नियमावलीत काय? केंद्रीय नागरी उड्डाण मंत्रालयानं २०१८मध्ये ड्रोनच्या वापरासंदर्भात नियमावली जाहीर केली होती. प्रत्येक ड्रोनसाठी एक युनिक आयडेंटीफिकेशन क्रमांक दिला जातो. याशिवाय परमिट आणि अन्य मंजुरीसाठी व्यवस्था करण्यात आली आहे. परवानगीशिवाय ड्रोन उडवणं बेकायदेशीर आहे. आता ३१ जानेवारीपर्यंत जे ड्रोनचे मालक स्वतःहून घोषणा करतील त्यांच्या ड्रोनसाठी यूनिक आयडी दिले जाणार आहे. हे दोन्ही क्रमांक ड्रोन उड्डाण किंवा ते बाळगण्याचे अधिकार देतील. ड्रोनची नोंदणी करण्यासाठी https://ift.tt/2KLRaTt यावर लॉगिन करावे लागेल.
