म. टा. खास प्रतिनिधी, मुंबई बेस्ट उपक्रमात हळूहळू दाखल होणाऱ्या मिनी, मिडी बसचा ताफा लगोलग बसमार्गांसाठी वापरण्यास मंगळवारपासून सुरुवात झाली. सध्या बेस्टच्या ताफ्यात मिनी, मिडीची संख्या १६६पर्यंत पोहोचली आहे. याच नव्या बसच्या आधारे दादर ते केईएमपर्यंतच्या नवीन मार्गास सुरुवात करण्यात आली आहे. ही एसी बस असून ती दादर रेल्वे स्थानक ते केईएमपर्यंत धावणार आहे. या बससेवेमुळे केईएम आणि त्या परिसरातील रुग्णालयात जावे लागणाऱ्या रुग्ण आणि त्यांच्या नातेवाईकांना मोठा आधार मिळणार आहे. दादरहून केईएम परिसरात जाण्याऱ्या रुग्ण आणि नातेवाईकांना टॅक्सीचालकांच्या मनमानीस सामोरे जावे लागते. शेअर टॅक्सी वा स्वतंत्रपणे टॅक्सी घेणाऱ्या प्रवाशांना टॅक्सीचालकांच्या मुजोरीचा नेहमीच त्रास होता. त्यास बेस्टच्या ए-२१७ क्रमांकाच्या एसी बसमुळे चाप बसण्यास मदत होणार आहे. बेस्टने सुरू केलेली ही बस सकाळी ६.५० वा. आणि शेवटची बस रात्री १०.४० वा. सुटेल. एसी बसचा ह्घ् प्रवास सहा रुपयांचा असल्याने गोरगरीब रुग्ण, नातेवाईकांचे यापुढे टॅक्सीसाठी मोजाव्या लागणारे पैसे वाचणार आहेत.
