मुंबई: शीना बोरा हत्याकांडातील आरोपी इंद्राणी मुखर्जी हिनं आपल्या जामीन अर्जाच्या याचिकेवरील सुनावणीदरम्यान, विशेष सीबीआय कोर्टात खळबळजनक दावा केला. २४ एप्रिल २०१२ रोजी शीनाच्या हत्येच्या सहा महिन्यांनंतरही ती जीवंत होती आणि ती आपल्या होणाऱ्या पतीसोबत अर्थात राहुल मुखर्जीसोबत होती, असं तिनं कोर्टात म्हटलं आहे. इंद्राणी मुखर्जी हिनं पाचव्यांदा जामिनासाठी याचिका दाखल केली आहे. त्यावर मंगळवारी सुनावणी झाली. त्यावेळी तिनं हा दावा करून खळबळ उडवून दिली. तिनं कोर्टात राहुलच्या कॉल डेटा रेकॉर्डचा हवाला दिला. राहुल आणि शीना यांच्यात २६, २७ आणि २८ सप्टेंबर रोजी मेसेजद्वारे संभाषणही झाले होते, असं तिनं कोर्टात सांगितलं. २७ सप्टेंबर २०१२ रोजी दोघांच्या मोबाइल क्रमांकावर पाठवलेले मेसेज तिनं वाचून दाखवले. मला जाणूनबुजून यात अडकवलं जात आहे. मी निरापराध आहे. ऑगस्ट २०१५मध्ये मला अटक झाल्यानंतर लगेच पीटर मुखर्जीनं त्याच्या खात्यातून माझ्या आणि त्याच्या दोन्ही मुलांच्या खात्यात सहा कोटी रुपये ट्रान्सफर केले. एप्रिल २०१२मध्ये शीनाच्या कथित हत्येनंतर ऑगस्ट २०१५मध्ये झालेल्या अटकेपूर्वी तिनं १९ वेळा भारतात आणि देशाबाहेर प्रवास केला. जर मी गुन्हा केला असता तर, मी परतली असते का? असं इंद्राणी म्हणाली. दरम्यान, या प्रकरणातील आरोपी पीटर मुखर्जी याला मुंबई हायकोर्टानं ६ फेब्रुवारी रोजी जामीन मंजूर केला होता.
