सेऊल: चीनमध्ये हाहाकार माजवल्यानंतर करोनाचा शेजारील देश दक्षिण कोरियामध्ये मोठ्या प्रमाणावर फैलाव होत असल्याचे चित्र आहे. मागील चार दिवसांत करोनाबाधित रुग्णांची संख्या आठपटीने वाढली आहे. करोनामुळे चार जणांचा मृत्यू झाला असून ५५६ जणांना करोनाची लागण झाली आहे. राजधानी सेऊलमध्ये आतापर्यंत ९ हजारहून अधिकजणांची स्क्रिनिंग करण्यात आली आहे. करोनाच्या संसर्गामुळे मृतांची संख्या वाढणार असल्याची भीती व्यक्त करण्यात येत आहे. न्यूमोनिआ आणि करोना सदृष्य आजारांनी बाधित असणाऱ्या रुग्णांना उपचारासाठी चिओंगडो रुग्णालयातून इतरत्र हलवण्यात येत आहे. यातील १७ जणांची प्रकृती गंभीर आहे. करोनाचा फैलाव वेगाने होत असल्याचे वृत्त आहे. मात्र, यावर नियंत्रण ठेवण्यात येणार असल्याचे कोरियन प्रशासनाने म्हटले आहे. करोनाचा संसर्ग डाइगू शहरापर्यंतच राहील याची काळजी घेण्यात येत असून आवश्यक त्या उपाययोजना आखल्या जात असल्याचे प्रशासनाने म्हटले आहे. डाइगू शहरात करोनाचा पहिला रुग्ण आढळला होता. त्याआधी, शुक्रवारी डाइगू आणि चिओंगडोमध्ये मागील दोन दिवसांत करोनाबाधित रुग्णांच्या संख्येत वाढ झाल्याने या ठिकाणांना 'स्पेशल केअर झोन्स' घोषित करण्यात आले. वाचा: सॅमसंगचा प्लांट बंद करोनाच्या भीतीमुळे गुमी शहरातील सॅमसंगचा प्लांट तात्पुरता बंद करण्यात आला असल्याची माहिती सॅमसंग कंपनीने दिली आहे. दक्षिण कोरियातील गुमी शहरात सॅमसंगचा प्लांट आहे. सॅमसंगच्या एका कर्मचाऱ्याला करोनाची बाधा झाली असल्याचे निष्पन्न झाले. त्यानंतर कंपनीने याठिकाणचे उत्पादन बंद करण्याचा निर्णय घेतला. या प्लांटमध्ये काम करणारे कामगार, कर्मचाऱ्यांवर उपचार करण्यात येणार आहेत. करोनाबाधित कर्मचाऱ्याच्या संपर्कात आलेल्या इतर कर्मचाऱ्यांना वेगळे ठेवण्यात आले आहे. प्रतिबंधात्मक उपाय म्हणून त्यांना वेगळे ठेवण्यात आले असल्याचे कंपनीने म्हटले आहे. या प्लांटमध्ये सॅमसंगच्या स्मार्टफोनचे उत्पादन सुरू होते. आता हा प्लांट तात्पुरता बंद ठेवण्यात आला असल्यामुळे त्याचा परिणाम मोबाइल उत्पादनावरही होणार आहे. आणखी वाचा:
