मुंबई- बाहुबली सिनेमात राणा डग्गुबतीने त्याच्या भारदस्त व्यक्तिमत्त्व आणि अभिनयाने साऱ्यांचं मन जिंकलं होतं. आता राणा लवकरच हाथी मेरे साथी सिनेमातून प्रेक्षकांच्या भेटीला येत आहे. या सिनेमासाठी त्याने ३० किलो वजन कमी केलं. इंग्रजी वृत्तपत्राला दिलेल्या मुलाखतीत राणाने कशाप्रकारे ३० किलो वजन कमी केलं ते सांगितलं. दग्गुबती म्हणाला, 'प्रभू सरांना सिनेमा रिअल वाटावा असंच वाटत होतं. वजन कमी करणं माझ्यासाठी खूप कठीण होतं. कारण सुरुवातीपासूनच माझ्या शरीराची रचना ही मोठं होतं. बारीक दिसण्यासाठी मी ट्रेनिंग घेतलं आणि त्यासोबत डाएटमध्ये बदल केला. माझ्या व्यायामाची पद्धत पूर्णपणे बदलली गेली. माझ्या व्यायामाकडे विशेष लक्ष दिलं जायचं. वेट ट्रेनिंग न करता मी जास्तवेळ चालणारे cardiovascular सेशन केले. या सगळ्यात सर्वातआधी माझा डाएट प्लॅन पूर्णपणे बदलण्यात आला. राणा पुढे म्हणाला की, मी प्रोटीनयुक्त पदार्थ खाणं सोडलं आणि काही काळासाठी शाकाहारी झालो. मीठ खाणंही कमी केलं. सोप्या भाषेत सांगायचं तर कमी जेवायला लागलो. सिनेमाच्या चित्रीकरण दरम्यान मी हेच डाएट जवळपास दोन वर्ष फॉलो केलं. या सिनेमात राणा लांब दाढी आणि करड्या रंगाची छटा असणाऱ्या केसांमध्ये दिसणार आहे. ३ एप्रिलला हा सिनेमा देशभरात प्रदर्शित होणार आहे. हा सिनेमा कन्नड, हिंदी, तमिळ आणि तेलगू भाषेत प्रदर्शित होणार आहे. सिनेमात पुलकित सम्राट आणि श्रेया पिळगावकरही दिसणार आहे. सिनेमाची कथा काजीरंगा नॅशनल पार्कमध्ये हत्तींसोबत झालेल्या अत्याचारावर आधारित आहे. सिनेमाचं चित्रीकरण दोन देशांत झालं आहे. भारतात सिनेमाचं चित्रीकरण केरळ, महाबळेश्वर आणि मुंबईमध्ये झालं. तर सिनेमाचा काही भाग थायलंडमध्ये चित्रीत करण्यात आला.
