वॉशिंग्टन: अमेरिकेत करोनाचा संसर्ग झालेल्या एका व्यक्तीचा मृत्यू झाला आहे. वॉशिंग्टनमधील या नागरिकाचा करोनामुळे मृत्यू झाला आहे. आरोग्य विभागाच्या अधिकाऱ्यांनी ही माहिती दिली. अमेरिकेत करोनामुळे झालेला हा पहिला मृत्यू आहे. दरम्यान, अमेरिकेने काही देशांमध्ये नागरिकांना प्रवास करण्यास मनाई केली आहे. ही व्यक्ती करोनाबाधित व्यक्तीच्या संपर्कात आली नव्हती. त्याशिवाय त्याने परदेशवारीदेखील केली नव्हती. त्यामुळे अमेरिकेत नव्या व्हायरसचा संसर्ग झाल्याची चर्चा होती. करोनाबाधित व्यक्ती खूपच आजारी होती. या व्यक्तीचे वय ५० वर्ष असल्याची माहिती आरोग्य विभागाने दिली. अमेरिकेचे उपराष्ट्रपती माईक पेन्स यांनी या निधनावर शोक व्यक्त केला आहे. करोनामुळे याआधी वुहान शहरात एका अमेरिकन नागरिकाचा मृत्यू झाला होता. अमेरिकेने आपल्या नागरिकांना इराण, दक्षिण कोरिया आणि इटलीतील काही भागात प्रवास करण्यास मनाई केली आहे. वाचा: दरम्यान, अमेरिकेत करोनाचा चौथा रुग्ण आढळल्याची माहिती आरोग्य अधिकाऱ्यांनी दिली आहे. वॉशिंग्टनमध्ये एक अल्पवयीन मुलाला करोनाचा 'संभाव्य संसर्ग' झाला असल्याची माहिती अधिकाऱ्यांनी दिली आहे. हा मुलगा ज्या शाळेत शिकतो, ती शाळा तीन मार्चपर्यंत बंद ठेवण्याचा निर्णय घेण्यात आला आहे. दरम्यान, करोनाचा प्रादुर्भाव वाढत असताना अमेरिकेत मात्र औषधांचा तुटवडा भासू लागला आहे. मात्र, नक्की कोणती औषधे आणि त्यांचे निर्माते कोण, याबाबत मात्र अधिक माहिती देण्यात आलेली नाही. मूलभूत औषधांचा तुटवडा भासत असला, तरी पर्यायी औषधांची व्यवस्था मात्र करण्यात आली आहे, असे अमेरिकेच्या आरोग्य अधिकाऱ्यांनी सांगितले आहे. आणखी वाचा:
