मुंंबई- सिनेमे आणि आपल्या सामाजिक कार्यातून लोकांच्या मनावर अधिराज्य करणाऱ्या सलमान खानने यावेळी गावातल्या लोकांपर्यंत धान्य पोहचवून फक्त त्यांचंच नाही तर देशभरातील चाहत्यांचं मन पुन्हा एकदा जिंकलं आहे. सलमान या लॉकडाउनच्या काळात गरजूंसाठी त्यांच्या जगण्यासाठीचा एक आशेचा किरण झाला आहे. सलमानने पुन्हा एकदा मोठा निर्णय घेत गरजूंसाठी त्याने बैलगाडी आणि ट्रॅक्टर भरून धान्य पाठवलं आहे. सलमान खानने सोशल मीडियावर शेअर केला व्हिडिओ- सलमानने रविवारी आपल्या ट्वीटर अकाउंटवरून एक व्हिडिओ शेअर केला. यात बैलगाडी, ट्रॅक्टर, पिकअपमध्ये धान्य भरून पाठवत होता. हे धान्य सलमान आणि यूलिया वंतूरसह अनेक लोक साखळी करून वाहनांमध्ये भरताना दिसतात. सर्वांच्या मदतीसाठी पुढे केल हात- याआधीही सलमानने गरजू कामगारांसाठी ट्रकमध्ये भरून धान्य पाठवलं होतं. याशिवाय सलमानने सिनेसृष्टीतील अशा गरजूंनाही मदत केली ज्यांच्यासोबत त्याने कधी कामही केलं नव्हतं. याशिवाय उंची कमी असणाऱ्या कलाकारांचीही त्याने मदत केली. त्यांच्या खात्यात काही रक्कम जमा केली. कामगारांच्या अकाउंटमध्ये ट्रान्सफर केले पैसे- सलमानने एप्रिल महिन्यात १६ हजार कामगारांच्या बँक अकाउंटमध्ये एकूण ४ कोटी ८० लाख रुपये ट्रान्सफर केले. याशिवाय मे महिन्यात १९ हजार कामगारांच्या बँक अकाउंटमध्ये एकूण ५ कोटी ७० लाख रुपये ट्रान्सफर केले. आतापर्यंत दोन महिन्यांत त्याने कामगारांना एकूण १० कोटी ५० लाखांची मदत केली आहे. फार्महाउसवर आहे सलमान खान- सध्या सलमान लॉकडाउनमध्ये पनवेल येथील फार्महाउसवर आहे. मित्र- परिवारासह तो या फार्महाउसवर जवळपास महिन्याहून जास्त काळ आहे. यूलिया वंतूर आणि जॅकलिन फर्नांडिसही सलमानसोबत फार्महाउसवर असल्याचं म्हटलं जात आहे.
