वर्धा: सुरत येथून ओडिशाकडे मजुरांना घेऊन निघालेली ट्रॅव्हल्स जिल्ह्यातील कारंजा घाडगे येथील पेट्रोल पंप जवळ पलटी झाली. भरधाव वेगात असलेल्या ट्रॅव्हल्ससमोर अचान एक प्राणी आल्याने चालकाचे गाडीवरील नियंत्रण सुटल्याने ही दुर्घटना घडली. यात तीन मजूर जखमी झाले आहेत. या घटनेनंतर ट्रॅव्हल्सचा चालक आणि क्लिनर घटनास्थळावरून पसार झाले असून पोलीस त्यांचा शोध घेत आहेत. लॉकडाऊन शिथिल होताच मजुरांना आपल्या गावी पोहचविण्यासाठी परवानगी मिळत आहे. त्यानुसार सुरत येथून ५० मजूर घेऊन एक ट्रॅव्हल्स ओडिशाकडे निघाली होती. मात्र, वर्धा जिल्ह्यातील कारंजा घाडगे येथे अचानक ही ट्रॅव्हल्स पलटी झाली. ट्रॅव्हल्स भरधाव वेगात असताना अचानक गाडीसमोर एक वन्यप्राणी आला. त्यामुळे या प्राण्याला वाचवताना चालकाचे गाडीवरील नियंत्रण सुटले आणि ट्रॅव्हल्स पलटी झाली. घटनेनंतर ट्रॅव्हल्स चालक आणि क्लिनर मात्र दुसऱ्या वाहनाने पसार झाले. या दुर्घटनेत तीन मजूर जखमी असून जखमींना ग्रामीण उपजिल्हा रुग्णालय कारंजा येथे उपचारासाठी दाखल करण्यात आले. याप्रकरणी पोलिसांनी गुन्हा दाखल केला असून अधिक तपास सुरू आहे. तसेच वैद्यकीय पथकानेही घटनास्थळी धाव घेतली असून इतर मजुरांची तपासणी सुरू आहे.
