बीड: भाजपनं विधान परिषदेची उमेदवारी नाकारल्यानंतर माजी मंत्री यांनी प्रथमच प्रतिक्रिया दिली आहे. 'पक्षाच्या या निर्णयाचा मला अजिबात धक्का बसला नाही. उमेदवारी मिळालेल्या चौघांनाही माझे आशीर्वाद आहेत,' असं सूचक ट्विट पंकजा यांनी केलं आहे. विधान परिषदेच्या ९ जागांसाठी लवकरच निवडणूक होणार आहे. यापैकी चार जागा निवडून आणण्याची संधी भाजपला आहे. चारही जागांवर पक्षाचे ज्येष्ठ नेते व माजी मंत्री एकनाथ खडसे, पंकजा मुंडे, विनोद तावडे आणि चंद्रशेखर बावनकुळे यांची नावे चर्चेत होती. मात्र, शेवटच्या क्षणी चौघांचाही पत्ता कापून पक्षानं नव्या चेहऱ्यांना संधी दिली. खडसे यांनी त्यावर तात्काळ आपली नाराजी नोंदवली. मात्र, पंकजा मुंडे काही बोलल्या नव्हत्या. शुक्रवारी रात्री उशिरा ट्विट करून त्यांनी आपल्या भावना मांडल्या. 'पक्षानं उमेदवार यादी जाहीर केल्यापासून दिवसभर फोन येते होते. कार्यकर्ते दु:ख व्यक्त करत होते. पण मी फोन उचलला नाही. कुणाकुणाला उत्तर देऊ,' अशी खंत पंकजा यांनी व्यक्त केली आहे. त्याचबरोबर आपल्या कार्यकर्त्यांना धीर देण्याचा प्रयत्नही त्यांनी केला आहे. 'वाघांनो, असं रडू नका. मी आहे ना! तुमच्यासाठी मी आणि माझ्यासाठी तुम्ही... साहेबांचे आशीर्वाद आहेत,' असंही त्यांनी ट्विटमध्ये नमूद केलं आहे. मागील विधानसभा निवडणुकीत भाजपचा गड असलेल्या परळी मतदारसंघात पंकजा मुंडे यांचा पराभव झाला होता. राष्ट्रवादीचे उमेदवार व मुंडे कुटुंबातीलच धनंजय मुंडे यांनी तिथं बाजी मारली होती. पराभवानंतर उद्विग्न झालेल्या पंकजा यांनी समर्थकांचा मेळावा घेऊन पक्षालाही इशाराही दिला होता. जनाधार असलेल्या भाजपमधील एक आक्रमक महिला नेत्या म्हणून पक्ष त्यांना विधान परिषदेत संधी देईल, असं मानलं जात होतं. तसे संकेतही मिळत होते. मात्र, ऐनवेळी त्यांना डावलले गेले. पंकजा मुंडे यांची पुढची भूमिका काय असेल, याबद्दल उत्सुकता आहे.
