लंडन करोना रोखण्यासाठी गेल्या दोन महिन्यांहून अधिक काळ जगभर टाळेबंदी सुरु आहे. सार्वजनिक वाहतूक , जल वाहतूक, रेल्वे तसेच विमान सेवा पूर्णपणे ठप्प आहे. या टाळेबंदीचे दुष्परिणाम आता दिसू लागले आहेत. विमानांचे इंजिन तयार करणाऱ्या ब्रिटनमधील 'रोल्स रॉइस' या सुप्रसिद्ध कंपनीने आर्थिक नुकसानीचे कारण पुढे करत किमान ९००० कर्मचाऱ्यांना कामावरून कमी केलं आहे. लॉकडाउनमधील ही आतापर्यंतची युरोपातील मोठी नोकर कपात मानली जात आहे. 'रोल्स रॉइस' ही 'बोइंग-७८७' आणि 'एअरबस-३५०' विमानांचे इंजिन तयार करते. मात्र या कंपनीने मोठ्या प्रमाणात कर्मचारी कपात केली आहे. कंपनीने जवळपास ९००० कमर्चाऱ्यांना नारळ दिला आहे. तसेच कंपनी प्रकल्पाची क्षमता कमी करण्याच्या विचारात आहे. विमान सेवा बंद असल्याने हवाई सेवा क्षेत्राशी निगडित उद्योगांना जबर फटका बसला आहे. कंपनीने खर्च कमी करण्यासाठी नोकर कपातीचा निर्णय घेतल्याचे 'रोल्स रॉइस'चे मुख्य कार्यकारी अधिकारी वॉरेन इस्ट यांनी सांगितले. ते म्हणाले की, १९८७ मध्ये कंपनीचे खासगीकरण झाल्यानंतरची ही दुर्दैवाने मोठी नोकर कपात ठरली आहे. 'रोल्स रॉइस'चे जगभरातील एकूण मनुष्यबळ ५२००० आहे. जर्मनी, सिंगापूरसह काही प्रमुख देशांमध्ये कंपनीचे १६ ते १७ प्रकल्प आहेत. खर्च कपातीच्या दृष्टीने ९००० कर्मचाऱ्यांना कामावरून कमी करण्यावाचून पर्याय उरला नही, असे इस्ट सांगितले. 'रोल्स रॉइस'ची वार्षिक उलाढाल १५ अब्ज पाउंडच्या आसपास आहे. करोनामुळे झालेले नुकसान भरून काढण्यासाठी कंपनीने दरवर्षी किमान १.३ अब्ज पौंडची बचत करण्याचा निर्धार केला आहे. आता ९००० कर्मचाऱ्यांना कमी केल्याने ७०० दशलक्ष पाउंडची बचत होणार आहे. ब्रिटनमध्ये बेरोजगारी देखील झपाट्याने वाढली आहे. करोना व्हायरसमुळे ब्रिटनमध्ये हजारोजणांचे प्राण गेले आहेत. ब्रिटन सरकारने नोकरी गमवणाऱ्यांसाठी आर्थिक मदत जाहीर केली आहे. या योजनेचा रोल्स रॉईसमधील किमान ४००० कर्मचाऱ्यांना लाभ होणार आहे. दरम्यान, या निर्णयाचे पडसाद शेअर बाजारात रोल्स रॉइसच्या शेअरवर उमटले. काल रॉल्स रॉइसचा शेअर २ टक्क्याने घसरला. चालू वर्षात रोल्स रॉइसच्या शेअरमध्ये तब्बल ६२ टक्के घसरण झाली आहे.
