पालघर: औरंगाबाद-जालना रेल्वे मार्गावर रेल्वे अपघतात १६ ठार झाल्याची बातमी ताजी असतानाच येथे कामगारांना घेऊन जाणाऱ्या एका ट्रेलरचा अपघात झाला आहे. परराज्यातील २० ते २५ कामगारांना घेऊन जाणारा हा ट्रेलर पलटी झाला. सुदैवाने या अपघातात कोणतीही जीवितहानी झाली नाही. मात्र काही मजुरांना किरकोळ मार लागला असून अपघात होताच सर्वांनी घटनास्थळाहून पळ काढला. त्यामुळे या सर्व मजुरांचा बोईसर पोलीस शोध घेत आहेत. बोईसर औद्योगिक वसाहतीतील एका स्टिल कारखान्यातून लोखंडी कॉईल घेऊन हा ट्रेलर काल रात्री निघाला होता. या ट्रेलरमधून परराज्यातील २० ते २५ कामगारही निघाले होते. रात्री १० वाजता मुकुट कंपनी येथील वळणावर येताच हा ट्रेलर पलटी झाला. ट्रेलर पलटी झाला तेव्हा या रस्त्यावर काही स्थानिक लोक उभे होते. या सर्वांनी ट्रेलरमधून या कामगारांना बाहेर काढले. त्यानंतर बोईसर पोलिसांना अपघाताची माहिती देण्यात आली. मात्र पोलीस येण्याच्या आत या कामगारांनी घटनास्थळावरून पळ काढला. ट्रेलरचा चालकही घटनास्थळाहून फरार झाला असून पोलीस त्याचा शोध घेत आहेत. या अपघातात कोणतीही जीवितहानी झाली नाही. काही कामगारांना किरकोळ मार लागल्याचे प्रत्यक्षदर्शींनी सांगितलं. हा ट्रेलर कोलकाता रोड लाइन कंपनीचा असल्याचं सांगण्यात आलं. बोईसर परिसरातील शेकडो कामगार मजूर मालवाहतूक करणाऱ्या ट्रेलरमधून धोकादायक प्रवास करून आपल्या गावी जाण्याचा प्रयत्न करत आहेत. पोलिसांनी शुक्रवारी व शनिवारी वाहनांवर कारवाई करून सुध्दा अशा प्रकारचा धोकादायक प्रवास सुरू आहे. त्यामुळे चिंता व्यक्त केली जात आहे.
