मुंबई- गेल्या आठवड्याभरापासून संगीतकार करोना व्हायरसशी लढा देत होते. किडनी आणि हृदयविकाराच्या त्रासाने त्यांचं निधन झालं. मुंबईतील चेंबूर येथील हॉस्पिटलमध्ये निधन झालं आहे. ते ४२ वर्षांचे होते. वाजिद खान व्हेंटिलेटरवर होते. रविवारी दुपारी त्यांची प्रकृती अधिकच खालावली आणि त्यांनी अखेरचा श्वास घेतला. आता त्यांची आई रझीना खानही करोना पॉझिटिव्ह असल्याचं म्हटलं जात आहे. त्यांना सुराना सेठिया इस्पितळात तातडीने भरती करण्यात आलं आहे. या इस्पितळात वाजिद यांच्या किडनीच्या आजारावर उपचार सुरू होते. मीडिया रिपोर्टनुसार, रजीना या वाजिदच्या आधीपासून करोना संक्रमित होत्या. त्यांना हे संक्रमण इस्पितळातील एका रुग्णाकडून आल्याचं म्हटलं जातं. सध्या त्यांच्यावर इस्पितळात उपचार सुरू आहेत. दरम्यान, दरम्यान, वाजिद यांचा हॉस्पिलमधला एक व्हिडिओ सोशल मीडियावर व्हायरल झाला आहे. व्हिडिओत वाजिद बेडवर बसलेले दिसतायत.' मी माझा भाऊ साजिदसाठी एकच गाणं गाणार ...त्यानंतर ते‘दबंग’ चित्रपटातील गाणं गाताना दिसतात. बाजूच्या बेडवरील रुग्ण देखील ऐकून आनंदी होताना दिसतात.शेवटपर्यतं दुसऱ्याच्या चेहऱ्यावर त्यांनी हास्य फुलवलं. पण त्यांच्या हा व्हिडिओ शेवटचा ठरला. वाजिद यांच्या निधनानं बॉलिवूडवर शोककळा पसरली आहे. प्रियांका चोप्रा, सोनू निगम, शंकर महादेवन, वरूण धवन, सलीम मर्चंट यांच्यासह बॉलिवूडच्या अनेक कलावंतांनी ट्विटरच्या माध्यमातून वाजिद खान यांना श्रद्धांजली वाहिली आहे. साजिद-वाजिद जोडी आणि सलमान खान यांचं 'हिट कॉम्बिनेशन' होतं. सलमानच्या अनेक चित्रपटांना या जोडीने संगीत दिलं. अलीकडेच सलमानच्या भाई-भाई आणि प्यार करोना या चित्रपटांसाठी या जोडीने संगीत दिलं आहे. 'दबंग', 'वॉन्टेड', 'वीर', 'नो प्रॉब्लेम', 'गॉड तुस्सी ग्रेट हो', 'पार्टनर' यासह सलमानच्या विविध चित्रपटांची गाणीही वाजिद यांनी गायली होती. साजिद-वाजिद जोडीने 'एक था टायगर', 'दबंग', 'दबंग २', 'दबंग ३', 'पार्टनर', 'सन ऑफ सरदार', 'रावडी राठोड', 'हाउसफुल २' यांसारख्या अनेक हिट चित्रपटांना संगीत दिलं आहे. साजिद-वाजिद साजिद-वाजिद जोडगोळीचा नेहमीच बॉलिवूडमध्ये दबदबा राहिला. टीव्हीवरील प्रसिद्ध 'सारेगमप २०१२', 'सारेगमप सिंगिंग सुपरस्टार' शोसाठी या जोडीने परीक्षक म्हणून काम पाहिले होते. आयपीएल-४ चं थीम सॉंग 'धूम धूम धूम धडाका' याच जोडगोळीने संगीतबद्ध केलं होतं. हे गाणं वाजिद यांनी गायलं होतं. वाजिद यांच्या निधनाने अनेक हिट गाणी देणाऱ्या साजिद-वाजिद या दोन भावांची ताटातूट झाली आहे. प्रसिद्ध तबलावादक उस्ताद शराफत अली खान हे त्यांचे वडील होते.
