मुंबई: करोनाच्या पार्श्वभूमीवर पुकारण्यात आलेलं लॉकडाऊन शिथिल होऊ लागताच राष्ट्रवादी काँग्रेसचे आमदार यांनी कामाला सुरुवात केली आहे. त्यांनी नुकतीच 'लालबागच्या राजा'ची मूर्ती साकारणाऱ्या विजय आर. खातू कला अकादमीला भेट दिली व आगीमुळं झालेल्या नुकसानीची पाहणी केली. () चिंचपोकळी इथं प्रसिद्ध गणेश मूर्तीकार विजय खातू यांची ही कला अकादमी आहे. इथे मूर्ती कार्यशाळा आणि कारखाना आहे. मागील महिन्यात या कारखान्याला मोठी आग लागली होती. त्यात बरंच नुकसानही झालं होतं. रोहित पवार आज या अकादमीची पाहणी केली. तेथील कर्मचाऱ्यांशी चर्चा केली. प्रसिद्ध मूर्तीकार खातू यांच्या कन्या रेशमा खातू यांची भेट घेऊन विचारपूसही केली. त्यांनी स्वत: ट्विट करून ही माहिती दिली आहे. काही फोटोही शेअर केले आहेत. गणेशोत्सव हा महाराष्ट्रातील मोठा उत्सव असतो. हा उत्सव आता दोन महिन्यांवर येऊन ठेपलाय. करोना संकटाच्या पार्श्वभूमीवर यंदाचा गणेशोत्सव नेमका कसा साजरा होणार याबाबत अनिश्चितता आहे. मात्र, हे विघ्न लवकरच दूर होईल या आशेनं गणेशमूर्तीकारांनी प्रतिवर्षीप्रमाणे तयारी सुरू केली आहे. वाचा: खातू कला अकादमीच्या मूर्तींची ख्याती केवळ मुंबईतच नव्हे तर महाराष्ट्रात आहे. महाराष्ट्राबाहेरूनही खातू यांच्या गणेश मूर्तींना मागणी असते. मात्र, यंदा घडलेल्या आगीच्या दुर्घटनेमुळं खातू कला अकादमीला अडचणींचा सामना करावा लागतो आहे. याच पार्श्वभूमीवर रोहित पवार यांनी इथे भेट देऊन पाहणी केली.
