मुंबई : आज सराफा बाजारात सोने ४०० रुपयांनी वधारले आहे. सोन्याचा भाव १० ग्रॅमला ४९१०० रुपये झाला आहे. चांदीमध्ये तेजीची लाट असून आज प्रती किलो ५२०२० रुपये झाला. त्यात १२० रुपयांची वाढ झाली आहे. मुंबईत यापूर्वीच सराफा पेढींवर सोन्याचा भाव १० ग्रॅमला ५१००० रुपयांवर (करांसहित) गेला होता. अमेरिका-चीन यांच्यातील दोलायमान संबंध, भारत-चीन यांच्यातील ताणलेले संबंध, जागतिक स्तरावर कोव्हिड-१९ (करोना) विषाणूचा वाढणारा संसर्ग, देशात पुन्हा एकदा लॉकडाउन केले जाणार अशी सुरू असलेली चर्चा, अर्थव्यवस्थेत आधीच असलेली मंदी आणि त्यात करोना संकटाची पडलेली भर या सर्वांमुळे आपले भवितव्य काय असेल, याची चिंता सर्वांनाच वाटत आहे. ही चिंता विविध वित्तसंस्थांनाही वाटत असून, त्यांनीही सोने व चांदी या मौल्यवान धातूंची खरेदी करण्याचा सपाटा लावला आहे. याचा परिणाम म्हणून सोन्याने उच्चांकी भावाची नोंद केली. गुरुवारी शुद्ध सोन्याचा किरकोळ दर १० ग्रॅमसाठी ५१ हजार रुपयांवर गेला, तर २२ कॅरेट सोन्याला ४९,२०० रुपये भाव मिळाला. चांदीचा भाव एका किलोसाठी ५०,१४० रुपये नोंदवला गेला. स्थानिक कमॉडिटी बाजारात गुरुवारी सोन्याचा भाव ४८८७८ रुपये होता. त्यात ०.७५ टक्क्याची घसरण झाली. चांदीचा भाव ५१०९१ रुपये झाला. goodreturns.in या वेबसाईटनुसार आज शुक्रवारी मुंबईत २२ कॅरेट सोन्याचा भाव ४७४१० रुपये आहे. २४ कॅरेटचा भाव ४८४१० रुपये झाला आहे. दिल्लीत २२ कॅरेट सोनं ४७९१० रुपये आणि २४ कॅरेटचा भाव ४९११० रुपये आहे. कोलकात्यात २२ कॅरेटचा भाव ४८२६० रुपये आणि २४ कॅरेटचा भाव ४९८४० रुपये आहे. चेन्नईत २२ कॅरेट सोन्याचा भाव ४७९१० रुपये आहे. २४ कॅरेटचा भाव ५१४७० रुपये झाला आहे. गेल्या वर्षभरात सोन्याच्या किमतीमध्ये जवळपास २५ टक्क्यांची वाढ नोंदविण्यात आल्याचे दिसून आले आहे. १९ जुलै २०१९ रोजी सोन्याची किंमत प्रति दहा ग्रॅमसाठी ३५,३८२ रुपये होती. आता ही किंमत प्रति दहा ग्रॅमसाठी ४८ हजार रुपयांच्या आसपास पोहोचली आहे. आर्थिक मंदी आणि करोना विषाणूच्या प्रादुर्भावाच्या पार्श्वभूमीवर सोन्यात होणाऱ्या गुंतवणुकीचे प्रमाण गेल्या दीड वर्षात वाढीस लागले आहे. देशामध्ये सोन्याचे भाव वाढण्याचे प्रमुख कारण म्हणजे बँकांनी २०१८-१९मध्ये खरेदी केलेले सोने होय. विविध बँकांनी या आर्थिक वर्षात ६०० टन सोन्याची खरेदी केली आहे. त्यामुळे सोन्याची मागणी वाढली आणि भाव वधारले.अर्थतज्ज्ञांनी दिलेल्या माहितीनुसार सामान्य गुंतवणूकदारांव्यतिरिक्त जगभरातील बड्या केंद्रीय बँकांनी मोठ्या प्रमाणात सोने खरेदीवर भर दिला आहे. सोने खरेदी करणाऱ्या केंद्रीय बँकांमध्ये रिझर्व्ह बँक, युरोपीयन सेंट्रल बँक, पीपल्स बँक ऑफ चायना, फेडरल रिझर्व्ह आदींचा समावेश आहे. देशाच्या केंद्रीय बँकेमध्ये जितके सोने अधिक असेल, तितके त्या देशाचे क्रेडिट रेटिंग चांगले असल्याचे मानले जाते.
