मुंबई : सोन्याच्या वाढत्या किमतींनी ग्राहकांचे डोळे पांढरे केले आहे. दररोज सोन्याच्या दरात मोठी उलथापालथ होत असून यामुळे गुंतवणूकदारांचा जीव टांगणीला लागला आहे. जगभरात करोनाचा धोका अद्याप कमी झालेला नाही. रशियाकडून करोना प्रतिबंधात्मक लसीचे उत्पादन सुरु करण्यात आले आहे. मात्र भारतासह इतर देशांत अजूनही करोनाबाधितांची संख्या झपाट्याने वाढत आहे. त्यामुळे अर्थव्यवस्थेवरील मंदीचे संकट कायम आहे. या काळात सोने हाच पर्याय गुंतवणूकदारांसमोर असल्याने त्यातील उलाढाल मागील काही सत्रात प्रचंड वाढली असल्याचे जाणकारांचे म्हणणे आहे. आज कमॉडिटी बाजार सुरु होताच सोने आणि चांदी या दोन्ही मौल्यवान धातूंमध्ये विक्रीचा मारा दिसून आला. त्यामुळे सोन्याचा भाव प्रती १० ग्रॅमला ३६० रुपयांनी कमी झाला. सध्या तो ५३२११ रुपये आहे. चांदीच्या भावात ११४३ रुपयांची घट झाली असून चांदीचा भाव एक किलोला ६८३६२ रुपये आहे. चालू वर्षात करोनाच्या साथीने सोन्याची झळाळी वाढली आहे. सोन्याच्या दरात तब्बल ४० टक्के वाढ झाली आहे. मल्टी कमॉडिटी एक्सचेंजवर मागील दोन सत्रात सोने १३०० रुपयांनी महागले होते. चांदीच्या दरात २१०० रुपयांची वाढ झाली होती. ७ ऑगस्ट रोजी सोन्याने प्रती १० ग्रॅमसाठी ५६१९१ रुपये उच्चांकी स्तर गाठला होता. जागतिक बाजारात सोने २००० डॉलर प्रती औंस या निर्णायक पातळीवर आहे. स्पॉट गोल्ड (Spot Gold) चा भाव ०.१ टक्क्याने वधारून २००२.१२ डॉलर प्रती औंस झाला आहे. चांदीचा भाव ०.६ टक्क्याने वाढला असून तो २७.८२ डॉलर प्रती औंस आहे. दरम्यान, अमेरिकेन शेअर बाजारात मंगळवारी मोठी वाढ दिसून आली. त्यापाठोपाठ आशियात देखील तेजी असल्याने सोने चांदीत नफावसुली होत असल्याचे कमॉडिटी विश्लेषकांचे म्हणणं आहे. goodreturns या वेबसाईटनुसार आज बुधवारी मुंबईत २२ कॅरेट सोन्याचा भाव ५२२२० रुपये आहे. २४ कॅरेटचा भाव ५३२२० रुपये आहे. चांदीचा भाव एक किलोसाठी ७१११० रुपये आहे. दिल्लीत २२ कॅरेट सोने ५११६० रुपये असून २४ कॅरेटचा भाव ५५१०० रुपये आहे. कोलकात्यात २२ कॅरेट सोने ५२९८० रुपये असून २४ कॅरेटचा भाव ५५७१० रुपये आहे. चेन्नईत २२ कॅरेटचा भाव ५१६८० रुपये असून २४ कॅरेटचा भाव ५६३७० रुपये आहे.
