बदायूँ: उत्तर प्रदेशातील बदायूँ जिल्ह्यात एक भयंकर आणि चीड आणणारी घटना उघडकीस आली आहे. पत्नीच्या गर्भात मुलगा आहे की मुलगी हे जाणून घेण्यासाठी पतीने तिचे पोट फाडले. शेजारील नागरिकांनी महिलेला तात्काळ रुग्णालयात दाखल केले. त्यानंतर तिची प्रकृती चिंताजनक असल्याने बरेलीला नेण्यात आले. या दाम्पत्याला पाच मुली आहेत. बदायूँचे पोलीस अधीक्षक (शहर) प्रवीण सिंह चौहान यांनी सांगितले की, नेकपूर परिसरात ही घटना घडली आहे. संबंधित महिला ही गरोदर आहे. पन्नालाल असे आरोपीचे नाव आहे. त्याने आपल्या गर्भवती पत्नीच्या पोटावर धारदार शस्त्राने वार केले. तिची प्रकृती गंभीर आहे. तिला रुग्णालयात दाखल करण्यात आले आहे. आरोपी पन्नालाल याच्याविरोधात गुन्हा दाखल करण्यात आला असून, त्याला अटक करण्यात आली आहे. पत्नीवर जीवघेणा हल्ला करण्यामागील नेमके कारण काय आहे, याचा तपास केला जात आहे. महिलेची प्रकृती गंभीर असून, तिला पुढील उपचारासाठी येथील रुग्णालयात नेण्यात आले आहे, अशी माहिती पोलिसांनी दिली. पन्नालाल याला मुलगा हवा होता. तिच्या गर्भात मुलगा आहे की मुलगी हे जाणून घेण्यासाठी त्याने पोटावर वार केले. त्याला मुलगा हवा होता, असा आरोप पीडितेच्या माहेरच्या लोकांनी केला आहे. मिळालेल्या माहितीनुसार, आरोपी पन्नालाल याला पाच मुली आहेत. सहाव्यांदा त्याची पत्नी गरोदर राहिली आहे. तिने कोणत्या तरी मांत्रिकाला हात दाखवल्यानंतर सहावी मुलगीच होणार असल्याचे त्याने सांगितले. त्याने शनिवारी रात्री पत्नीला गर्भपात करण्यास सांगितले. पत्नीने नकार दिला. त्यानंतर त्याने तिच्या पोटावर धारदार शस्त्राने वार केले.
