वॉशिंग्टन: अमेरिकेत करोनाचे थैमान सुरू आहे. करोनाच्या संसर्गाला अटकाव करण्यासाठी अमेरिकेने फायजर-बायोएनटेकच्या लशीनंतर मॉडर्नाच्या लशीला मंजुरी दिली. फायजर-बायोएनटेकच्या लशीमुळे दुष्परिणाम जाणवत असल्याची प्रकरणे समोर येत असताना दुसरीकडे आता मॉडर्ना लशीच्याबाबतही तशाच तक्रारी समोर येत आहेत. अमेरिकेतील डॉक्टर हुसैन सद्रजादेह यांना लस दिल्यानंतर त्यांना त्रास झाल्याचे समोर आले. अमेरिकेने पाच दिवसांपूर्वीच मॉडर्नाच्या लस देण्यास सुरुवात केली आहे. अमेरिकेतील बोस्टन शहरातील बोस्टन मेडिकल सेंटरमधील कर्करोगाचे डॉक्टर हुसैन यांनी नाताळाच्या पूर्वसंध्येला घेतली. त्यानंतर त्यांना चक्कर येऊ लागली. त्याशिवाय त्यांच्या हृदयाचे ठोकेही वाढले. मॉडर्नाच्या लशीला मंजुरी दिल्यानंतर पहिल्यांदाच लशीचे दुष्परिणाम समोर आले. या डॉक्टरला आधीपासूनच एलर्जाचा त्रास होत होता. डॉ हुसैन यांनी सांगितले की, लस घेतल्यानंतर त्यांची जीभ सुन्न झाली. तर, रक्तदाबही मोठ्या प्रमाणावर कमी झाला. हा त्रास हायपर सेसिंटिविटीशी निगडीत होता. याआधीदेखील शेलफिश खाल्ल्यानंतरही असाच त्रास झाला होता. डॉक्टर हुसैन यांनी एलर्जी जाणवू लागल्यानंतर त्यांना तात्काळ एपिपेन औषध देण्यात आले आणि तात्काळ आपात्कालीन खोलीत नेण्यात आले. काही तासानंतर त्यांना डिस्चार्ज देण्यात आला. याआधीदेखील फायजर-बायोएनटेकच्या लशीचे दुष्परिणाम समोर आले होते. अमेरिकेतील अलास्का शहरात दोन आरोग्य कर्मचाऱ्यांना लस दिल्यानंतर त्यांची तब्येत बिघडल्याचे दिसून आले. लस दिल्यावर काही मिनिटातच आरोग्य कर्मचाऱ्यांना त्रास होऊन तब्येत खालावली होती. हे दोघेही आरोग्य कर्मचारी एकाच रुग्णालयात कार्यरत होते. लस देण्यात आलेल्या एका महिला आरोग्य कर्मचाऱ्याला आधीपासून अॅलर्जीचा कोणताही त्रास नव्हता. लस दिल्यानंतर पहिल्या दहा मिनिटातच तिची तब्येत खालावू लागली. ब्रिटनमध्येही दोन प्रकरणे समोर आली होती. नवीन स्ट्रेनविरुद्ध लस चाचणी मॉडर्नाची लस नव्या स्ट्रेनविरुद्ध प्रभावी ठरेल असा विश्वास कंपनीने व्यक्त केला आहे. अमेरिकेत मॉडर्नाच्या लशीला नुकतीच आपात्कालीन परिस्थितीत वापरासाठी मंजुरी मिळाली आहे. नव्या स्ट्रेनविरुद्ध लशीचा प्रभाव जाणून घेण्यासाठी आगामी काही दिवसात लस चाचणी होणार असल्याचे कंपनीने स्पष्ट केले आहे.
