मुंबई- बॉलिवूड अभिनेत्री तिच्या सिनेमांपेक्षा सामाजिक आणि राजकीय विषयांवर आपलं मत व्यक्त करण्यामुळे अधिक चर्चेत आहे. यामुळेच तिला अनेक टीकांचा सामनाही करावा लागतो. पण या सगळ्याची कंगनाला मुळीच भिती नाही. कितीही टीका झाली तरी ती आपलं मत सोशल मीडियावर मांडतच असते. शेतकरी आंदोलनानंतर आता कंगनाने लव जिहादच्या कायद्यावर आपली प्रतिक्रिया दिली आहे. कंगनाने यासाठी तयार करण्यात आलेल्या कायद्याला पाठिंबा दर्शविला आहे. एका यूझरने धर्म लपवून हिंदू मुलीशी लग्न केल्याची बातमी ट्विटरवर शेअर केली होती. यासोबतच त्याने धर्मांतराविषयीची चिंता व्यक्त केली होती. यूझरच्या या ट्वीटवर कंगनाने प्रतिक्रिया दिली आहे. कंगनाने आपली प्रतिक्रिया देताना लव जिहाद कायद्याचं समर्थन केलं असून, कायद्याचा विरोध करणाऱ्यांवरही प्रश्नचिन्ह उभे केले आहेत. अभिनेत्रीने आपल्या ट्वीटमध्ये लिहिले की, 'दररोज आपण अशा बर्याच प्रकरणांबद्दल ऐकत असतो. या लव जिहाद कायद्यात काही लोकांना नक्की काय समस्या आहे हे मला कळत नाही. जर तो प्रेम विवाह आहे आणि दोघांनाही आपली खरी बाजू माहीत आहे तर हे दोघांसाठीही चांगलं आहे. पण जर एखाद्या स्त्रीची फसवणूक झाली असेल तर तिच्या न्यायासाठी कोण लढा देईल?' सोशल मीडियावर कंगनाचं हे ट्वीट जोरदार व्हायरल होत आहे. तिच्या या ट्वीटवर अभिनेत्रीचे अनेक चाहते प्रतिक्रिया देत आहेत. सामाजिक राजकीय मुद्द्यांवर उघडपणे बोलणार्या कंगनाला या दिवसांमध्ये बऱ्याच टीकांचा सामना करावा लागत आहे. गेल्या काही दिवसांपासून ती शेतकरी आंदोलनाचा निषेध करत आहे. तिच्या या विरोधालाच अनेक सेलेब्रिटी आणि लोक टीका करत आहेत. दरम्यान, कंगनाने शेतकऱ्यांच्या भारत बंदच्या आवाहनावर प्रतिक्रिया दिली होती. भारत बंदवर तिने खास ट्वीटही केलं होतं. 'चला भारत बंद करू या, तसं पाहायला गेलं तर आपल्याकडे संकटांची काही कमतरता नाही, पण तरीही आपण त्यात अजून भर टाकू.. दररोज कोणाना कोणाच्या आशा मरत असतात. आता देशप्रेमींना सांगा की त्यांच्या वाटणीचा देशाचा तुकडा तुम्हीही मागून घ्या. रस्त्यावर उतरा आणि तुम्हीही आंदोलनं करा. आज हा विषयच संपवून टाकू..'
