वृत्तसंस्था, नवी दिल्ली : प्रजासत्ताक दिनी होत असलेली आंदोलक शेतकऱ्यांची प्रस्तावित ट्रॅक्टर रॅली उधळण्यासाठी पाकिस्तानातून तब्बल ३००हून अधिक ट्विटर हँडल कार्यन्वित करण्यात आली होती, असा खळबळजनक दावा दिल्ली पोलिसांनी रविवारी केला आहे. या पार्श्वभूमीवर सुरक्षेचे मोठे आव्हान असून प्रजासत्ताक दिनाचा सोहळा संपल्यानंतर ट्रॅक्टर रॅली होईल आणि त्यासाठी कडक बंदोबस्त ठेवला जाईल, अशी माहिती विशेष पोलिस आयुक्त (गुप्तवार्ता) दीपेंद्र पाठक यांनी दिली. 'लोकांची दिशाभूल करून संभ्रम निर्माण करत शेतकऱ्यांची प्रस्तावित ट्रॅक्टर रॅली उधळण्यासाठी १३ ते १८ जानेवारी या कालावधीत पाकिस्तानातून ३०८ ट्विटर हँडल कार्यन्वित करण्यात आली होती. याबाबत विविध यंत्रणांकडूनही गुप्तवार्ता मिळाली होती,' असे पाठक यांनी शनिवारी पत्रकार परिषदेत सांगितले. याबाबत दिल्ली पोलिसांनी हरयाणा आणि उत्तर प्रदेश पोलिसांच्या अधिकाऱ्यांशीही चर्चा केली आहे. प्रजासत्ताक दिनाचे संचलन संपल्यानंतर ट्रॅक्टर रॅलीसाठी कडक बंदोबस्त तैनात करण्यात येईल, असे त्यांनी स्पष्ट केले. शेतकऱ्यांच्या ट्रॅक्टर रॅलीच्या मार्गांबाबत अधिक माहिती देताना पाठक यांनी स्पष्ट केले की, ही रॅली टिकरी, सिंघू आणि गाझीपूर सीमेवरून दिल्लीत प्रवेश करेल आणि नंतर आपल्या मूळ ठिकाणी परत येईल. तीन मार्गांवर १७० किमीच्या मार्गांची परवानगी शेतकऱ्यांना देण्यात आली आहे. रॅली शांततापूर्ण आणि शिस्तबद्ध रितीने पार पडावी, यासाठी ट्रॅक्टरची मार्गांवर विभागणी करण्यात यावी आणि प्रजासत्ताक दिनाचा सोहळा तसेच सुरक्षा व्यवस्थेला कोणतीही बाधा पोहचू नये, अशा पद्धतीने रॅली पार पडेल, असे पाठक यांनी सांगितले. केंद्र सरकारच्या तीन हटवण्याच्या मागणीसाठी नोव्हेंबर महिन्यापासून शेतकरी राजधानी दिल्लीच्या सीमांवर आंदोलन करत आहेत. कृषी कायद्यांच्या निषेधार्थ दिल्लीत प्रजासत्ताक दिनी ट्रॅक्टर रॅली काढण्यास शेतकऱ्यांच्या संघटनांना शनिवारी दिल्ली पोलिसांकडून परवानगी मिळाली होती. त्यासाठी रविवारी संध्याकाळपर्यंत दिल्लीच्या विविध सीमांवर १२ ते १३ हजार ट्रॅक्टर दाखल झाले होते. शेतकऱ्यांनी आपली ट्रॅक्टर रॅली दिल्लीच्या बाहेर करावी, अशी भूमिका पोलिसांनी प्रारंभी घेतली होती. मात्र दिल्लीतील व्यग्र आउटर रिंग रोडवरच ट्रॅक्टर रॅली करण्याचा पवित्रा शेतकऱ्यांनी कायम ठेवला होता. अखेर शेतकरी संघटना व दिल्ली पोलिस यांच्यात चर्चेच्या तीन फेऱ्या पार पडल्यानंतर, अखेरीस चौथ्या फेरीत या ट्रॅक्टर रॅलीला मान्यता देण्यात आली होती.
