वृत्तसंस्था, नवी दिल्ली सीरम इन्स्टिट्यूटच्या 'कोव्हिशील्ड'च्या चाचण्या देशभर सुरू असताना आता 'सीरम'ने 'नोव्हाव्हॅक्स'च्या '' या करोनाप्रतिबंधक लशीच्या चाचण्या सुरू करण्याची मागणी औषध महानियंत्रकांकडे मागितली आहे. 'सीरम'चे सीईओ यांनी ट्विट करून शनिवारी याबाबत माहिती दिली. आदर पूनावाला म्हणाले, 'नोव्हाव्हॅक्ससोबत विकसित करण्यात आलेल्या करोना प्रतिबंधक लशीचेही सकारात्मक परिणाम दिसून आले असून, देशात या लशीच्या मानवी चाचण्या सुरू करण्यासाठी आम्ही परवानगी मागितली आहे. जून २०२१ पर्यंत ही लस बाजारात उपलब्ध होण्याची शक्यता आहे.' ऑक्सफर्ड-अॅस्ट्राझेनेका यांच्या सहकार्याने सीरमने 'कोव्हिशील्ड' ही लस बाजारात आणली असून भारतात तिचे लसीकरणही सुरू झाले आहे. 'नोव्हाव्हॅक्स' या अमेरिकी कंपनीच्या करोनाप्रतिबंधक लशीबाबतचे संशोधन व उत्पादन करण्याबाबत कंपनीने सीरम इन्स्टिट्यूटशी ऑगस्ट २०२० मध्ये करार केला आहे. 'नोव्हाव्हॅक्स' कंपनीच्या लशीचे भारतात उत्पादन करण्याचा हक्क या कराराद्वारे ''ला मिळाला. उच्च मध्यम किंवा उच्च उत्पन्न असलेले देश वगळता अन्य देशांसाठी करोना साथरोगाच्या काळात सीरम इन्स्टिट्यूटला 'नोव्हाव्हॅक्स' लशीचे उत्पादन करण्याचा हक्क मिळाला आहे. सर्व परवानग्या मिळून चाचण्या सुरळीत पार पडल्यास 'कोव्हाव्हॅक्स' ही भारतात आपत्कालीन वापरासाठी परवानगी मिळणारी तिसरी लस ठरणार आहे. सध्या देशात 'कोव्हिशील्ड' आणि 'कोव्हॅक्सिन' या दोन्हींचे लसीकरण सुरू आहे. दरम्यान, देशात सुमारे ३५ लाख नागरिकांना गेल्या चोवीस तासांत करोनाचे लसीकरण करण्यात आले, अशी माहिती आरोग्य मंत्रालयाकडून देण्यात आली. नवे दोन हजार ६३० रुग्ण मुंबई : महाराष्ट्रात शनिवारी दिवसभरात दोन हजार ६३० करोनाबाधित रुग्ण आढळले, तर एक हजार ५३५ करोनाबाधित रुग्ण बरे होऊन घरी परतले. राज्यात आजपर्यंत एकूण १९ लाख २७ हजार ३३५ करोनाबाधित बरे झाले आहेत. यामुळे राज्यात रुग्ण बरे होण्याचे प्रमाण ९५.२३ टक्के झाले आहे, अशी माहिती आरोग्यमंत्री राजेश टोपे यांनी दिली. राज्यात करोनाबाधित रुग्ण बरे होणाऱ्यांच्या तुलनेत शनिवारी दिवसभरात करोनाबाधित रुग्णांची संख्या वाढली आहे. शनिवारी राज्यात दोन हजार ६३० नवीन करोनाबाधित रुग्णांचे निदान झाले आहे. यामुळे राज्यातील करोनाबाधित रुग्णांची एकूण संख्या २० लाख २३ हजार ८१४ इतकी झाली आहे. आजपर्यंत राज्यात तपासण्यात आलेल्या एक कोटी ४५ लाख ५९ हजार १६० प्रयोगशाळा नमुन्यांपैकी २० लाख २३ हजार ८१४ नमुने पॉझिटिव्ह आले आहेत. हे प्रमाण १३.९ टक्के इतके आहे. राज्यात शनिवारी दिवसभरात ४२ करोनाबाधित रुग्णांचा मृत्यू झाल्याची नोंद करण्यात आली आहे. राज्यात आजतागायत करोनामुळे दगावलेल्या रुग्णांची एकूण मृत्यू संख्या ५१ हजार ४१ इतकी झाली आहे. सध्या राज्यातील मृत्यूदर २.५२ टक्के इतके आहे. सध्या राज्यात एक लाख ९१ हजार ९७५ व्यक्ती घरात विलगीकरणामध्ये आहेत. दोन हजार २३४ व्यक्ती संस्थात्मक विलगीकरणामध्ये आहेत. राज्यात सध्या एकूण ४४ हजार १९९ उपचाराधीन रुग्ण आहेत.
