बंगळुरू : कर्नाटकाच्या शिमोगा जिल्ह्यात गुरुवारी रात्री झालेल्या स्फोटानं अनेकांना धडकी भरली. डायनामाईटच्या या स्फोटात आठ जणांचा मृत्यू झाला आहे. एका दगडखाणीत हा स्फोट झाला आहे. यांनी या घटनेवर दु:ख व्यक्त केलंय. सरकार पीडितांना आवश्यक ती मदत उपलब्ध करून देत असल्याचं पंतप्रधान नरेंद्र मोदी यांनी म्हटलंय. शिमोगा हा कर्नाटकचे मुख्यमंत्री बी एस येडियुरप्पा यांचा गृह जिल्हा आहे. स्फोटकं ट्रकमध्ये होता की ट्रकच्या बाजुला याचा शोध अद्याप सुरू असल्याचं एडीजीपी प्रताप रेड्डी यांनी म्हटलंय. पोलिसांनी दिलेल्या माहितीनुसार, अद्यापही काही डायनामाईट संपूर्णत: निष्क्रीय झालेले नाहीत. यासाठी पोलिसांनी बॉम्ब स्कॉडचीही मदत घेतली जातेय. तसंच स्फोट झालेला संपूर्ण भाग सील करण्यात आला आहे. प्रत्यक्षदर्शींच्या म्हणण्यानुसार, स्फोट इतका तीव्र होता की त्यामुळे घरांच्या खिडक्या आणि तावदानं तुटून पडले. तसंच अनेक ठिकाणी रस्त्यांवरदेखील भेगा पडल्या आहेत. पोलिसांनी दिलेल्या माहितीनुसार, स्फोट शिमोगा शहरापासून ५-६ किलोमीटर दूर अंतरावर झाला. कर्नाटकचे एडीजीपी (कायदेव्यवस्था) प्रताप रेड्डी यांच्या म्हणण्यानुसार, हा स्फोट शिमोगा ग्रामीण भागात घडला. उल्लेखनीय म्हणजे, काही महिन्यांपूर्वीही अशाच पद्धतीच्या आवाजानं बंगळुरूला घाम फोडला होता. मात्र, भारतीय वायुसेनेच्या एका लढाऊ विमानानं परीक्षणादरम्यान सॉनिक बूम बॅरियर तोडल्यामुळे हा आवाज झाल्याचं नंतर समजलं होतं. ही घटना मागच्या मे महिन्यात घडली होती. त्यामुळे नागरिकांनी आजच्या आवाजाचाही काहीसा असाच कयास लावण्याचा प्रयत्न केला. आवाजानं लोक इतके त्रस्त झाले की ते बाहेर येऊन चर्चा करू लागले. हा भूकंप आहे का? अशीही शक्यता त्यांना वाटत होती.
