मुंबई : देशात पहिल्यांदाच पेट्रोलने शंभरी गाठली तरी पेट्रोलियम कंपन्यांची कमाईची भूक भागलेली नाही. आज गुरुवारी सलग दहाव्या दिवशी कंपन्यांनी पेट्रोल-डिझेलच्या किमतीत वाढ केली. या दरवाढीने दिल्लीत डिझेल ८० रुपयानजीक पोहोचले आहे. पेट्रोल ९० रुपयांच्या उंबरठ्यावर आहे. आज मुंबईत पेट्रोलने ९६ रुपयांची पातळी गाठली. इंधन दरवाढीने लवकरच महागाईचा आगडोंब उसळण्याची शक्यता आहे. आज कंपन्यांनी पेट्रोल दरात ३४ पैसे आणि डिझेलमध्ये ३२ पैसे वाढ केली. आजच्या दरवाढीनंतर मुंबईत पेट्रोलचा भाव ९६.३२ रुपये झाला आहे. मुंबईत एक लीटर डिझेलसाठी ग्राहकांना आता ८७.३२ रुपये मोजावे लागतील. राज्यात परभणीमध्ये पेट्रोलचा भाव सर्वाधिक ९८.१९ रुपये आहे. दिल्लीत आज एक लीटर पेट्रोल ८९.८८ रुपये झाले आहे. डिझेलचा भाव ८०.२७ रुपये झाला आहे. चेन्नईत आजचा पेट्रोलचा भाव ९१.९८ रुपये झाला आहे. डिझेलसाठी ८५.३३ रुपये भाव आहे. कोलकात्यात आज पेट्रोल ९१.११ रुपये झाले आहे. डिझेलचा भाव ८३.३६ रुपये झाला आहे.बंगळुरात पेट्रोल ९२.८९ रुपये असून डिझेल ८५.०९ रुपये झाला आहे.राजस्थानमधील श्री गंगानगर जिल्ह्यात बुधवारी पेट्रोलने शंभरी गाठली होती. देशभरात पहिल्यांदाच पेट्रोल १०० रुपयांवर गेले होते. यापूर्वी महाराष्ट्रातील परभणी, मध्य प्रदेशातील भोपाळ या शहरात प्रिमियम पेट्रोल (XP) १०० रुपयांवर गेले आहे. दरम्यान, जागतिक कमॉडिटी बाजारात आज कच्च्या तेलाच्या किमतीने ६५ डॉलरची पातळी ओलांडली आहे. ब्रेंट क्रूडचा भाव ६५ डॉलर आहे. त्यात १.८ टक्क्यांची वाढ झाली. गेल्या १३ महिन्यांतील हा उच्चांकी दर आहे. याआधी २१ जानेवारी २०२० रोजी ब्रेंट क्रूडचा भाव ६५ डॉलर प्रती बॅरल होता. दरम्यान, इंधन दरवाढीने देशात वातावरण तापले आहे. नागरिकांमधील संतापाची लाट असून विरोधी पक्षांकडून केंद्र सरकारवर टीका केली जात आहे. या पार्श्वभूमीवर केंद्र सरकारने सौदी अरेबिया आणि इतर तेल उत्पादक देशांना उत्पादन वाढवण्याची विनंती केली आहे. तेलाच्या चढ्या किमतीमुळे अर्थव्यवस्थेवरील सुधारणांमध्ये अडथळा निर्माण झाला आहे. बाजारात तेलाचा पुरवठा वाढला तर कच्च्या तेलाचे भाव कमी होतील, असे सरकारचे म्हणणे आहे. इंधनावावर केंद्र आणि सरकारचा प्रचंड कर आहे. पेट्रोल दराच्या जवळपास ६० टक्के आणि डिझेल दराच्या ५४ टक्के रक्कम कर स्वरूपात केंद्र आणि राज्य सरकारच्या तिजोरित जमा होते. त्यामुळे सरकारकडून इंधन दरवाढ रोखण्यासाठी शुल्क कपातीसारख्या उपाययोजनांचा अवलंब करण्यास चालढकल केली जात असल्याचे जाणकारांचे म्हणणे आहे.
