मुंबई : वायदे बाजारात आज गुरुवारी सोन्याच्या किमतीत वाढ झाली आहे. सोन्याचा भाव १५८ रुपयांनी वधारला असून तो प्रती १० ग्रॅम ४६३९५ रुपयांपर्यंत गेला. मात्र ऑगस्ट २०२० मध्ये वायदे बाजारातील ५६२०० रुपयांच्या विक्रमी पातळीच्या तुलनेत सोने अजून जवळपास १० हजार रुपयांनी स्वस्त आहे. चालू महिन्यातील सलग तिसऱ्या आठवड्यात सोन्याच्या किमतींवर दबाव कायम आहे. १ फेब्रुवारी रोजी केंद्रीय अर्थमंत्री निर्मला सीतारामन यांनी संसदेत बजेट सादर केले होते. त्यात सीतारामन यांनी सोन्यावरील आयात शुल्कात पाच टक्के कपातीची घोषणा केली होती. सध्या सोन्यावर १२.५ टक्के आयात शुल्क आहे. एप्रिलपासून ते ७.५ टक्के होईल. मात्र शुल्क कपातीचा परिणाम सोन्याच्या किमतीवर दिसून आला. त्यानंतर सुरु झालेली घसरण थांबण्याची चिन्हे नाहीत. सध्या मल्टी कमॉडिटी एक्सचेंजमध्ये सोन्याचा भाव प्रती १० ग्रॅम ४६३९५ रुपये आहे. त्यात १५८ रुपयांची वाढ झाली आहे. एक किलो चांदीचा भाव ६९३८३ रुपये असून त्यात १५२ रुपयांची वाढ झाली आहे. दरम्यान, बुधवारी सराफा बाजारात देखील सोन्याचा भाव गडगडला होता. दिल्लीतील सराफा बाजारात सोने ७१७ रुपयांनी स्वस्त झाले. सोन्याचा भाव ४६१०२ रुपयांवर बंद झाला. तर चांदीमध्ये १२७४ रुपयांची घसरण झाली. एक किलो चांदीचा भाव ६८२३९ रुपये झाला. मल्टी कमॉडिटी एक्सचेंजमध्ये बुधवारी सोने २३७ रुपयांनी घसरले होते. जागतिक बाजारात सोने दरात होत असलेल्या घसरणीचे पडसाद स्थानिक बाजारावर उमटत असल्याचे एचडीएफसी सिक्युरिटीजचे कमॉडिटी विश्लेषक तपन पटेल यांनी सांगितले. जागतिक बाजारात सोन्याचा भाव १७८६ डॉलरपर्यंत खाली आला आहे. चांदीचा भाव प्रती औंस २७.१० डॉलर आहे. good returns या वेबसाईटनुसार आज गुरुवारी मुंबईत २२ कॅरेट सोन्याचा भाव ४५६८० रुपये झाला आहे. तर २४ कॅरेट सोन्याचा भाव ४६६८० रुपये झाला आहे. दिल्लीत २२ कॅरेट सोन्याचा भाव ४५८९० रुपये आहे. २४ कॅरेटसाठी तो ५००९० रुपये झाला आहे. चेन्नईत २२ कॅरेटसाठी ४३९३० रुपये असून २४ कॅरेटचा भाव ४७९३० रुपये आहे. कोलकात्यात २२ कॅरेट सोन्याचा भाव ४६१६० रुपये असून २४ कॅरेट सोन्याचा भाव ४८८६० रुपये आहे.
