वॉशिंग्टन: अमेरिकेतील कलाकारांसह विविध संस्था, संघटनांनी भारतातील शेतकरी आंदोलनाबाबत भाष्य केल्यानंतर आता अमेरिकन सरकारने या आंदोलनाबाबत मत व्यक्त केले आहे. अमेरिकेच्या परराष्ट्र मंत्रालयाने शांततेच्या मार्गाने आंदोलन करणे हे लोकशाही जिवंत असल्याचे लक्षण आहे. वाद सोडवण्यासाठी चर्चेचा मार्ग आवश्यक असल्याचे सांगत भारतात खासगी क्षेत्राच्या गुंतवणुकीची पाठराखण अमेरिकेच्या परराष्ट्र मंत्रालयाने केली आहे. अमेरिकेच्या परराष्ट्र मंत्रालयाने म्हटले की, भारतातील बाजारपेठेची कार्यकुशलता सुधारण्यासाठी आणि मोठ्या प्रमाणावर खासगी गुंतवणुकीला आकर्षित करण्यासाठी उचलण्यात आलेल्या पावलांचे अमेरिका स्वागत करते. लोकांना इंटरनेट वापरासह माहिती मिळवण्याचा अधिकार हा अभिव्यक्ती स्वातंत्र्याचा एक भाग असल्याचे आम्ही मानत असून यशस्वी लोकशाहीसाठी हे आवश्यक असल्याचे अमेरिकेने म्हटले आहे. कोणत्याही वादावर चर्चेतून मार्ग काढता येऊ शकतो असेही अमेरिकेने म्हटले. वाचा: भारतात मागील दोन महिन्यांपासून नव्या कृषी कायद्याविरोधात दिल्लीच्या सीमेवर शेतकऱ्यांचे आंदोलन सुरू आहे. प्रजासत्ताक दिनी दिल्लीत हिंसाचारही झाला होता. मात्र, अमेरिकन पॉप सिंगर रिहानासह अनेक आंतरराष्ट्रीय सेलिब्रेटी व संस्था, संघटनांनी या शेतकरी आंदोलनाला पाठिंबा देण्याचे आवाहन केले. अमेरिकेच्या उपराष्ट्रपती कमला हॅरीस यांची भाची, लेखिका मीना हॅरीस यांनी कॅपिटॉल हिलमधील हिंसाचार आणि शेतकरी आंदोलनावर सुरू असलेली दडपशाही ही एकाच मानसिकतेतून होत असल्याचे म्हटले आहे. वाचा: भारतातील शेतकरी आंदोलनाचे एक छायाचित्र ट्विट करत मीना हॅरीस यांनी म्हटले की, जगातील सर्वात जुन्या लोकशाहीवर एक महिन्यापूर्वीच हल्ला झाला. त्यानंतर आता जगातील सर्वात मोठ्या लोकशाहीवर धोका निर्माण झाला आहे. या दोन्ही घटना एकमेकांशी निगडीत असल्याचे त्यांनी म्हटले. भारतात आंदोलन करणाऱ्या शेतकऱ्यांविरोधात सुरक्षा दलाकडून होणारी दडपशाही आणि इंटरनेट बंद करण्याच्या निर्णयाविरोधात आवाज उठवला पाहिजे.
