म. टा. प्रतिनिधी, नाशिककरांना बिबट्या दिसणे नवीन नाही. पण, काही दिवसांपूर्वी महामार्गालगतच्या हॉटेलमध्ये थेट सिंह आल्याचे नाशिककरांना दिसले. सीसीटीव्हीत कैद झालेली सिंहाची उडी नाशिककरांच्या सोशल मीडियावर व्हिडीओ स्वरुपात अपलोड झाली होती. त्यानंतर हळूहळू पांडवलेणी, देवळालीसह वनक्षेत्रालगतच्या नागरिकांना सतर्कतेचा इशाराही नाशिककरांनीच दिला. वन विभाग याबाबत पूर्णत: अनभिज्ञ होता. पण, नाशिककरांमध्ये सिंहदर्शनाची ओरड उठल्यावर वन विभागाने व्हिडीओची खात्री केली. अखेरीस हा व्हिडीओ गुजरातमधील जुनागड येथील असून, नेटिझन्सच्या चुकीमुळे तो नाशिकमध्ये व्हायरल झाल्याचे उघड झाले. 'बिबट्यापर्यंत ठीक होते. पण, आता नाशिकमध्ये सिंहीण आली आहे. नाशिक-मुंबई महामार्गालगतच्या एका मोठ्या हॉटेलच्या मागील बाजूने सिंहिणीने एंट्री घेतली आहे. परिसरातील नागरिकांना अलर्ट करा. रात्री बाहेर फिरू नका...' असे मेसेज आणि सिंह फिरतानाचा व्हिडीओ असंख्य नाशिककरांनी व्हायरल केला. चार-पाच दिवसांत प्रत्येकाच्या व्हॉट्सअॅपमध्ये हा व्हिडीओ पोहोचल्यावर नागरिकांमध्ये धास्ती वाढली. बिबट्या अगदी घरापर्यंत येऊन हल्ले करीत असताना काही दिवसांपूर्वी वाघाच्या दर्शनाचीही आवई उठली होती. आता थेट सिंहाचेच दर्शन म्हटल्यावर वन विभागापर्यंत ही बाब पोहोचली. वनाधिकाऱ्यांनी व्हिडीओ तपासून गुजरातमध्ये नुकताच अशी घटना घडली असून, हा व्हिडीओ तेथील असल्याचे स्पष्ट केले. मुळातच नाशिक वनपरिक्षेत्रात बिबट्याचे वास्तव्य अधिक असून, जळगाव वनक्षेत्र वगळता इतरत्र नाशिक वनवृत्तात वाघाचे दर्शनही दुर्लभ आहे. यामुळे नाशिकमध्ये वाघसुद्धा कधीही दिसला नसून सिंह येणे अशक्यच असल्याचे वरिष्ठ वनाधिकाऱ्यांनी स्पष्ट केले. कोणत्याही मेसेज किंवा व्हिडीओची खात्री न करता व्हायरल करण्याच्या नादात नाशिककर स्वत:सह इतरांनाही धडकी भरवल्याचे हे उदाहरण आहे. यामुळे वन्यजीवांबाबत अफवा पसरवून भीती निर्माण करणाऱ्यांवर आता गुन्हे दाखल करणार असल्याची भूमिका वन विभागाने घेतली आहे.
