मुंबई : विक्रीच्या माऱ्यामुळे आज शुक्रवारी मल्टी कमॉडिटी एक्सचेंजमध्ये सोने दराने ४६ हजारांची पातळी तोडली आहे. आज एमसीएक्सवर सोन्याचा भाव १६३ रुपयांनी कमी झाला असून तो ४५८६१ रुपये झाला. गेल्या आठ महिन्यातील सोन्याचा नीचांकी स्तर आहे. चालू महिन्यात सोन्याच्या किमतींवर दबाव कायम आहे. १ फेब्रुवारी रोजी केंद्रीय अर्थमंत्री निर्मला सीतारामन यांनी संसदेत बजेट सादर केले होते. त्यात सीतारामन यांनी सोन्यावरील आयात शुल्कात पाच टक्के कपातीची घोषणा केली होती. त्यानंतर कमॉडिटी ट्रेडर्स आणि साठेबाजांनी सोन्याची विक्री सुरु केली आहे. सध्या मल्टी कमॉडिटी एक्सचेंजमध्ये एक किलो चांदीचा भाव ६७७५० रुपये असून त्यात ७४४ रुपयांची घसरण झाली आहे. आज चांदीने ६७५३० रुपयांची नीचांकी पातळी गाठली होती. good returns या वेबसाईटनुसार आज शुक्रवारी मुंबईत २२ कॅरेट सोन्याचा भाव ४५६९० रुपये झाला आहे. तर २४ कॅरेट सोन्याचा भाव ४६६९० रुपये झाला आहे. दिल्लीत २२ कॅरेट सोन्याचा भाव ४५५४० रुपये आहे. २४ कॅरेटसाठी तो ४९६८० रुपये झाला आहे. चेन्नईत २२ कॅरेटसाठी ४३४०० रुपये असून २४ कॅरेटचा भाव ४७३५० रुपये आहे. कोलकात्यात २२ कॅरेट सोन्याचा भाव ४६१५० रुपये असून २४ कॅरेट सोन्याचा भाव ४८८५० रुपये आहे. सराफा बाजारात गुरुवारी सोने ३२० रुपयांनी स्वस्त झाले होते. सोन्याचा भाव ४५८६७ रुपयांवर बंद झाला होता. तर चांदीमध्ये २८ रुपयांची किरकोळ तेजी दिसून आली. एक किलो चांदीचा भाव ६८२८३ रुपयांवर बंद झाली. जागतिक बाजारात सोन्याचा भाव प्रती औंस १७८२.६१ डॉलर आहे. त्यात ०.४ टक्के वाढ झाली. त्याआधीच्या सत्रात बुधवारी झाली हाती. डॉलरचे मूल्य वधारणे आणि बॉण्ड यिल्ड वाढल्याने सोन्याच्या दरात घसरण झाल्याचे बोलले जाते.
