केपटाउन: दक्षिण आफ्रिकेतील लसीकरण कार्यक्रमामध्ये ‘अॅस्ट्राझेनेका’च्या लशीचा वापर थांबवण्याचा निर्णय घेण्यात आला आहे. त्यामुळे या लशीचे उत्पादन करणाऱ्या सीरम इन्स्टिट्यूट ऑफ इंडियाने पाठवलेले दहा लाख डोस परत घ्यावेत, असे दक्षिण आफ्रिकेने सांगितले आहे. ‘अॅस्ट्राझेनेका’च्या लशीचे उत्पादन घेणाऱ्या ‘सीरम’ने पाठवलेले दहा लाख डोस गेल्या आठवड्यात दक्षिण आफ्रिकेत पोहोचले होते. याशिवाय आणखी पाच लाख डोस येत्या काही आठवड्यांत दक्षिण आफ्रिकेत पोहोचणार आहेत. मात्र, दक्षिण आफ्रिकेने लशीचे डोस मागे घेण्यास कंपनीला सांगितले आहे. या संदर्भात ‘सीरम’ने प्रतिक्रिया दिलेली नाही. वाचा: ‘अॅस्ट्राझेनेका’च्या लशीचे डोस सरकार विकू शकते. देशात आढळणाऱ्या करोना विषाणूच्या सौम्य ते मध्यम संसर्गापासून संरक्षण देण्यात ही लस किमान संरक्षण देत असल्याचे वैद्यकीय चाचणीत दिसून आले. त्यानंतर या लशीचा वापर थांबवण्याचा निर्णय घेण्यात आल्याचे दक्षिण आफ्रिकेच्या आरोग्यमंत्र्यांनी म्हटले आहे. वाचा: नव्या विषाणूमुळे चिंता वाढली करोनाच्या नव्या स्ट्रेनमुळे अनेक देशांची काळजी वाढली आहे. ब्रिटन, दक्षिण आफ्रिका आणि ब्राझीलमध्ये आढळलेले स्ट्रेन हे अधिक संसर्गजन्य आहे. दक्षिण आफ्रिकेत आढळलेल्या स्ट्रेनवर करोना लशीचा फारसा परिणाम झालेला आढळून आला नाही. करोनाच्या नव्या स्ट्रेनला रोखण्यासाठी लस विकसित करण्याचे प्रयत्न सुरू आहेत. मॉडर्नाकडून नव्या स्ट्रेनसाठी बूस्टर शॉट तयार केला जात आहे. तर, फायजर-बायोएनटेकची लसही नव्या स्ट्रेनवर कमी प्रभावी आढळली आहे. वाचा: पाकमध्ये ९५८ नवीन रुग्ण इस्लामाबाद : पाकिस्तानमध्ये तीन महिन्यांत प्रथमच दिवसभरात आढळलेल्या नवीन करोनाबाधित रुग्णांची संख्या एक हजारपेक्षा कमी नोंदवली गेली. पाकिस्तानमध्ये मंगळवारी ९५८ नवीन रुग्ण आढळले. पाकिस्तानमधील करोनाबाधितांची एकूण संख्या पाच लाख ६४ हजार ८२४ इतकी झाली आहे. आतापर्यंत पाच लाख २७ हजार ६१ रुग्ण बरे झाल्याचे पाकिस्तानी आरोग्य मंत्रालयाने म्हटले आहे. नवीन रुग्णाची नोंद नाही वेलिंग्टन : न्यूझिलंडमध्ये मंगळवारी सलग दुसऱ्या दिवशी सामूहिक संसर्ग झालेल्या नवीन करोनाबाधित रुग्णांची नोंद झाली नाही. त्यामुळे ऑकलंड येथील लॉकडाउन आज, बुधवारी मागे घेतला जाण्याची शक्यता आहे. दरम्यान, एका कुटुंबातील तिघांना करोना संसर्ग कसा झाला याची माहिती मिळू शकलेली नाही. रुग्ण आढळल्यानंतर ऑकलंडमध्ये तीन दिवसांचा लॉकडाउन जाहीर करण्यात आला होता.
