मुंबई : सलग दुसऱ्या दिवशी भांडवली बाजारात तेजीची लाट धडकली आहे. सेन्सेक्स १००० अंकांनी वधारला असून निफ्टीने ३०० अंकांची झेप घेतली आहे. बाजारात तेजीचा धडाका कायम राहण्याची शक्यता जाणकारांनी व्यक्त केली आहे. अवघ्या १५ मिनिटांच्या या तेजीत गुंतवणूकदारांनी जवळपास एक लाख कोटींची कमाई केली आहे. काल सोमवारी सेन्सेक्स २३०० अंकांनी वधारला होता. यात गुंतवणूकदारांची मालमत्ता ५.५० लाख कोटींनी वाढली होती. केंद्र सरकारच्या विकासाभिमुख अर्थसंकल्पाने भांडवली बाजाराचा नूर पालटला आहे. सोमवारी अर्थमंत्री निर्मला सीतारामन यांनी मोदी सरकारचा अर्थसंकल्प संसदेत सादर केला. या अर्थसंकल्पात कर रचना कायम ठेवण्यात आली आहे. त्याचबरोबर सरकारने उत्पन्नवाढीसाठी सामान्यांवर कोणताही कर भार लादलेला नाही. यामुळे भांडवली बाजारातील वातावरण सकारात्मक बनले. सोमवारी बजेट सादर होतानाच शेअर निर्देशांकांनी मोठी झेप घेतली होती. बाजार बंद होताना सेन्सेक्स तब्बल २३०० अंकांनी वधारला तर निफ्टीत ६५० अंकाची प्रचंड वाढ झाली होती. आज ही तेजी आणखी वाढली. सेन्सेक्स आणि निफ्टीने तेजीची आगेकूच कायम ठेवली. परकीय गुंतवणूकदार पुन्हा बाजाराकडे वळाले असल्याचे शेअर दलालांनी सांगितले. सध्या भांडवली बाजारात सेन्सेक्स मंचावर ३० पैकी २९ शेअर वधारले आहेत. ज्यात एचडीएफसी बँक, एचडीएफसी , आयसीआयसीआय बँक, एशियन पेंट्स, रिलायन्स इंडस्ट्रीज, एसबीआय, डॉ. रेड्डीज लॅब, टायटन, अल्ट्राटेक सिमेंट या शेअरच्या किमती चांगली वाढ झाली आहे. हिंदुस्थान युनिलिव्हर या शेअरमध्ये सध्या घसरण झाली आहे. आज सर्वच क्षेत्रात गुंतवणूकदार चांगले शेअर खरेदी करत आहेत. विशेषतः काल बजेटमध्ये बँकिंग, पायाभूत सेवा, आरोग्य, स्थावर मालमत्ता या क्षेत्रासाठी मोठ्या तरतुदी जाहीर करण्यात आल्या होत्या. त्यामुळे आज अपेक्षेनुसार त्यात तेजी दिसून आली. त्याशिवाय आज अनेक बड्या कोर्पोरेट्सचे तिमाही निकाल देखील जाहीर होणार आहेत. त्याकडे गुंतवणूकदारांचे लक्ष असेल.
