बीजिंग: अरुणाचल प्रदेशाच्या सीमेवर तिबेटमध्ये ब्रह्मपुत्रा नदीवर एक प्रचंड मोठे धरण बांधण्याची योजना चीनने आणखी पुढे रेटली आहे. हे धरण व संबंधित जलविद्युत प्रकल्पाला चीनच्या संसदेने गुरुवारी मंजुरी दिली. चीनच्या संसदेत गेले ६ दिवस चौदाव्या पंचवार्षिक योजनेवर चर्चा सुरू होती. या चर्चेच्या अखेरच्या दिवशी, गुरुवारी या दोन्ही योजना चिनी संसदेने मंजूर केल्या. यासाठी अब्जावधी डॉलर खर्च करण्यात येणार आहेत. भारतासह बांगला देशाने यापूर्वीच या योजनांविषयी चिंता व्यक्त केली आहे. सत्ताधारी कम्युनिस्ट पक्षाचे प्राबल्य असणाऱ्या द नॅशनल पीपल्स काँग्रेसमध्ये १४वी पंचवार्षिक योजना गुरुवारी स्वीकारण्यात आली. २०३५पर्यंतच्या आर्थिक आणि सामाजिक सुधारणांसंबंधी योजनांचा यामध्ये समावेश आहे. चीनचे अध्यक्ष शी जिनपिंग, पंतप्रधान ली क्विआंग व अन्य नेत्यांच्या उपस्थितीत या पंचवार्षिक योजनेस मंजुरी देण्यात आली. वाचा: या योजनेनुसार ब्रह्मपुत्रा नदीच्या खालच्या भागातील प्रवाहक्षेत्रात हे महाकाय धरण बांधणे प्रस्तावित आहे. कम्युनिस्ट पार्टी ऑफ चायनाच्या बैठकीत गेल्या वर्षी यासंबंधीचा आराखडा मंजूर करण्यात आल्यानंतर भारत व बांगला देशाने त्यावर आक्षेप घेतला होता. असे धरण उभारल्यास आमच्या देशांच्या संबंधित भागांत पूरसदृश स्थिती निर्माण होईल, अशी भीती या देशांनी व्यक्त केली होती. मात्र, या धरणामुळे अन्य देशांना कोणत्याही प्रकारे उपद्रव होणार नाही याची काळजी घेतली जाईल, असे चीनने म्हटले होते. वाचा: उभारणीची घाई या धरणाचे बांधकाम चालू वर्षीच सुरू करावे, अशी मागणी स्वायत्त तिबेटमधील कम्युनिस्ट पार्टीचे उपाध्यक्ष चे दाल्हा यांनी पंचवार्षिक योजनेवरील चर्चेदरम्यान केली. चीनने यापूर्वी २०१५मध्ये तिबेटमधील झांग्मू येथे दीड अब्ज अमेरिकी डॉलर खर्च करून जलविद्युत प्रकल्प कार्यान्वित केला आहे. वाचा: भारत, बांगलादेशवर परिणाम तिबेटच्या स्वायत्त भागातून उगम पावणारी ब्रह्मपुत्र नदी अरुणाचल प्रदेशमधून भारतात प्रवेश करते. अरुणाचल प्रदेशमध्ये या नदीला सियांग नदी म्हटले जाते. त्यानंतर ही नदी आसाममध्ये दाखल होते. आसाममध्ये या नदीला ब्रह्मपुत्र नदी म्हटले जाते. आसाममधून ही नदी बांगलादेशमध्ये प्रवेश करते ब्रह्मपुत्र नदी ही ईशान्य भारतातील राज्यांमध्ये आणि बांगलादेशमध्ये ही नदी जीवनवाहिनी समजली जाते.
