पुदुच्चेरीः विधानसभा निवडणुकांच्या पार्श्वभूमीवर पंतप्रधान नरेंद्र मोदी आज केरळ, तामिळनाडू आणि केंद्र शासित प्रदेश पुदुच्चेरीत जाहीर प्रचारसभा घेणार आहेत. सर्व प्रथम ते केरळच्या पलक्कडमध्ये सभेला संबोधित करतील. यापार्श्वभूमीवर तयारी सुरू आहे. यानंतर ते तामिळनाडूला जातील. त्यानंतर ते संध्याकाळी पुदुच्चेरीचा दौरा करतील आणि सभेला संबोधित करतील. या तिन्ही राज्यांमध्ये ६ एप्रिलला मतदान होणार आहे. २ मे रोजी निकाल लागणार आहे. पंतप्रधान मोदींच्या सभेच्या पार्श्वभूमीवर पुदुच्चेरीत कडक बंदोबस्त ठेवण्यात आला आहे. इथे जमावबंदी लागू करण्यात आली आहे. यासोबतच २९-३० मार्चला इथे ड्रोन किंवा इतर मानवरहित उड्डाणांवर बंदी घालण्यात आली आहे. निवडणूक प्रचारासाठी पंतप्रधान मोदींचा हा दुसरा पुदुच्चेरी दौरा आहे. यापूर्वी २५ फेब्रुवारीला त्यांनी इथे एक सभा घेतली होती. यावेळी त्यांनी केंद्राच्या अनेक योजनांचं उद्घाटनही केलं होतं. मोदी हे एएफटी थिदल येथे सभेला संबोधित करतील, असं भाजपच्या सूत्रांनी सांगितलं. पुदुच्चेरीत एनडीएचे नेतृत्व एनआयएनआरसी करते. ३० मतदारसंघांपैकी १६ ठिकाणी एनआयएनआरसी निवडणूक लढत आहे. तर भाजप ९ आणि एआयएडीएमके ५ जागांवर निवडणूक लढवत आहे. एनआयएनआरसीचे नेते आणि माजी मुख्यमंत्री एन रंगासामी हे दोन जागांवरून निवडणूक लढवत आहेत.
