नवी दिल्ली: वर्ष २००६ तेव्हा क्रिकेटमध्ये टी-२०ची सुरूवात झाली नव्हती. ना भारताने पहिला टी-२० वर्ल्डकप जिंकला होता. ना आयपीएल, बिग बॅश लीग अथवा अन्य टी-२० लीग स्पर्धा सुरू झाल्या होत्या. आज ज्या पद्धतीने स्फोटक फलंदाजी करून धावांचा डोंगर उभा केला जातो, तसा वेग नव्हता. तरी क्रिकेटच्या इतिहासात १२ मार्च २००६ या तारखेला खास असे महत्त्व आहे. वनडे क्रिकेटमध्ये १२ मार्च २००६ असा एक सामना झाला होता ज्याने टी-२० प्रमाणे फलंदाजी झाली होती. या सामन्यात वनडे क्रिकेटच्या इतिहासात प्रथमच ४००हून अधिक धावा झाल्या होत्या, त्याही एकदा नव्हे तर दोन वेळा. जोहान्सबर्ग येथे झालेल्या सामन्याचा निकाल पाहून क्रिकेट चाहते देखील हैराण झाले होते. वाचा- दक्षिण आफ्रिका आणि ऑस्ट्रेलिया यांच्यात पाच सामन्याची वनडे मालिका सुरू होती. दोन्ही संघ मालिकेत २-२ अशा बरोबरीत होते. अखेरच्या सामन्यात ऑस्ट्रेलियाचा कर्णधार रिकी पॉन्टिंगने टॉस जिंकून प्रथम फलंदाजी करण्याचा निर्णय घेतला. या मैदानावर पॉन्टिंगने २००३ साली भारताचा पराभव करून वर्ल्डकप जिंकला होता. फलंदाजीसाठी अनुकूल असलेल्या या मैदानावर ऑस्ट्रेलियाने धमाकेदार फलंदाजी केली. ऑस्ट्रेलियाकडून एडम गिलख्रिस्ट आणि सायमन कॅटिचने सुरूवात केली. गिलख्रिस्टने ३५ चेंडूत अर्धशतक केले. पण त्यानंतर तो ४४ चेंडूत ५५ धावा करून बाद झाला. १५.२ षटकात ऑस्ट्रेलियाने १ बाद ९७ धावा केल्या होत्या. त्यानंतर पॉन्टिंग मैदानावर आला. पहिल्या पाच चेंडूवर त्याने एकही धाव घेतली नाही. तर सुरुवातीच्या १७ चेंडूत फक्त १० धावा केल्या. पण त्यानंतर जे झाले त्याचा कोणीही विचार केला नाही. आफ्रिकेच्या गोलंदजांची अशी धुलाई कधीच झाली नसेल. पॉन्टिंग कॅटीच यांनी ११९ धावांची भागिदारी केली. कॅटीच ७९ धावांवर बाद झाला. वाचा- दुसऱ्या बाजूला पॉन्टिंगकडून धुलाई सुरूच होती. आफ्रिकेचा कर्णधार ग्रॅमी स्मिथला समजत नव्हते की कोणत्या गोलंदाजाला चेंडू देऊ. प्रत्येक गोलंदाजाची धुलाई सुरू होती. मायकल हसीने तर ५१ चेंडूत ८१ धावा केल्या. तो बाद झाला तेव्हा ऑस्ट्रेलियाने ४६.१ षटकात ३७४ धावा केल्या होत्या. त्यानंतरच्या ओव्हरमध्ये पॉन्टिंग १०५ चेंडूत १६४ धावा करून बाद झाला तेव्हा ऑस्ट्रेलियाने ४०० धावा केल्या होत्या. वनडे क्रिकेटमध्ये प्रथमच इतक्या धावा झाल्या होत्या. ऑस्ट्रेलियाने ४ विकेटच्या बदल्यात ४३४ धावा केल्या. जो वनडे क्रिकेटमधील सर्वोच्च होता. ऑस्ट्रेलियाची फलंदाजी- आफ्रिकेकडून जॅक कॉलिसने ६ षटकात ७० धावा, मखाया टीनीने ९ षटकात ८० धावा दिल्या होत्या. सामन्याचा निकाल तेव्हाच स्पष्ट झाला होता जेव्हा ऑस्ट्रेलियाने ४३४ धावा केल्या. त्याच दुसऱ्या ओव्हरमध्ये ऑस्ट्रेलियाला पहिली विकेट मिळाली. कर्णधार स्मिथला साथ देण्यासाठी हर्शल गिब्स मैदानावर उतरला आणि ऑस्ट्रेलियाच्या स्वप्नाना सुरुंग लागला. स्मिथ आमि गिब्स यांनी ऑस्ट्रेलियाच्या गोलंदाजांना रिर्टन गिफ्ट देण्यास सुरूवात केली. या दोघांनी १३ चौकार आणि २ षटकारासह ५५ चेंडूत ९० धावा केल्या. आफ्रिकेने २०० धावांचा टप्पा पार केला होता आणि गिब्स वनडेतील पहिल्या द्विशतकाच्या जवळ पोहोचला होता. पण १११ चेंडूत १७५ धावा करून तो बाद झाला. त्याने २१ चौकार आणि ७ षटकार मारेल. तो बाद झाला तेव्हा आफ्रिकेने ३१.५ षटकात २९९ धावा केल्या होत्या. तरी देखील ऑस्ट्रेलियाला विजय जवळ दिसत होता. जॅक कॅलिस देखील २० धावांवर बाद झाला. वाचा- कॅलिस बाद झाल्यानंतर आफ्रिकेने विकेट गमवण्यास सुरूवात केली. पण एका बाजूने मार्क बाउचर विकेटवर थांबला होता आणि धावा देखील करत होता. जोहान वेनडरने फक्त १८ चेंडूत ३ षटकार आणि १ चौकारासह ३५ धावा केल्या. ४९.३ षटकानंतर जेव्हा एड्यू हॉल सात धावांवर बाद झाला तेव्हा सर्व क्रिकेट चाहत्यांचा श्वास रोखला होता. ऑस्ट्रेलियाला विजयासाठी एक विकेट तर आफ्रिकेला ३ चेंडूत २ धावांची गरज होती. आफ्रिकेला हा सामना इतक्या जवळ आणून गमवायचा नव्हता. तर ऑस्ट्रेलियाला इतकी मोठी धावसंख्या उभी करून पराभूत व्हायचे नव्हते. ब्रेट लीच्या हातात चेंडू होता आणि मखाया टीनी फलंदाज, त्याने कशी बशी एक धाव घेतली. आता दोन चेंडूत एक विकेट आणि एक धाव सामन्याचा निकाल ठरवणार होता. लीच्या चेंडूवर बाउचरने चौकार मारला आणि इतिहास घडवला. आफ्रिकेची फलंदाजी ऑस्ट्रेलियाचा संपूर्ण संघ निराश होता. इतकी मोठी धावसंख्या उभी करून त्यांचा पराभव झाला होता. या सामन्यात एकूण ८७ चौकार आणि २६ षटकार मारले गेले. जो एक विक्रम ठरला. ऑस्ट्रेलियाचा गोलंदाज मिक लुइसच्या नावावर एक असा विक्रम नोंदला गेला जो कोणालाही आवडणार नाही. त्याने १० षटकात एकही विकेट न घेता ११३ धावा दिल्या. वनडे क्रिकेटमधील ही आज देखील सर्वात महाग गोलंदाजी आहे. दक्षिण आफ्रिका आणि ऑस्ट्रेलिया यांच्यातील या सामन्याला १५ वर्ष झाली तरी ज्यांनी हा सामना पाहिला त्यांच्या मनात आठवणी ताज्या आहेत.
