भोपाळ : देशात वाढत्या करोना संक्रमणा दरम्यान एक धक्कादायक घटना मध्य प्रदेशातातील इंदूरमध्ये समोर आलीय. फैलावत चाललेल्या करोना संक्रमणामुळे देशात अनेक ठिकाणी कठोर निर्बंध घालण्यात आले आहेत. या नियमांचं सक्तीनं पालनही करून घेतलं जात आहे. याच दरम्यान सक्तीच्या सीमा ओलांडल्याच्या घटनाही समोर आल्या आहेत. मध्य प्रदेशातील इंदूरमध्ये मास्क योग्य पद्धतीनं परिधान केलं नाही म्हणून एका व्यक्तीला दोन पोलीस कर्मचाऱ्यांकडून रस्त्यावरच करण्यात आल्याची घटना समोर आलीय. मिळालेल्या माहितीनुसार, इंदूर शहरात मंगळवारी करोनाविरुद्ध तपासणी मोहीम सुरू होती. याच दरम्यान एका ३५ वर्षीय व्यक्तीचा मास्क नाकावरून खाली घसरलेला दिसल्यानंतर दोन पोलीस कर्मचाऱ्यांनी त्याला रोखलं. या ३५ वर्षीय व्यक्तीचं नाव कृष्णा केयर असं असून तो रिक्षा ड्रायव्हर म्हणून काम करतो. आपल्या आजारी असलेल्या वडिलांना भेटण्यासाठी कृष्णा रुग्णालयाकडे जात होता. पोलिसांनी कृष्णाला आपल्यासोबत पोलीस स्टेशनमध्ये येण्यास बजावलं. कृष्णाने यासाठी नकार दिल्यानंतर दोन्ही पोलीस कर्मचाऱ्यांनी त्याला रस्त्यावरच बेदम मारहाण केली. या मारहाणीचे काही व्हिडिओ आणि फोटो सोशल मीडियातून समोर आले आहेत. या फोटो-व्हिडिओत पोलीस त्याला कोणतीही सहानुभूती न दाखवता मारहाण करताना दिसत आहेत. यावेळी, कृष्णासोबत असलेल्या त्याच्या अल्पवयीन मुलाला हे दृश्यं पाहून धक्का बसला. तो केवळ मदतीसाठी रडत राहिला. दिवसाढवळ्या रस्त्यावर ही घटना घडत होती आणि बघे ही घटना कॅमेऱ्यात कैद करत होते. परंतु, कुणीही मदतीसाठी मध्ये पडलं नाही. या दोन पोलीस कर्मचाऱ्यांची नावं कमल प्रजापत आणि धर्मेंद्र जट असल्याचं समजतंय. या घटनेचा व्हिडिओ सोशल मीडियातून व्हायरल झाल्यानंतर दोन्ही कर्मचाऱ्यांना निलंबित करण्यात आलंय. संबंधित व्यक्तीनं पोलीस कॉन्स्टेबलची कॉलर पकडल्यानंतर आणि त्यांना शिवीगाळ केल्यानंतर त्यांनी मारहाण केल्याचा दावा, एका पोलीस अधिकाऱ्यानं केलाय. पोलिसांची प्रतिमा मलिन करण्यासाठी सोशल मीडियावर शेअर करण्यात आलेल्या फोटो आणि व्हिडिओमध्ये छेडछाड करण्यात आल्याचा दावाही पोलीस अधीक्षक आशुतोष बागरी यांनी केलाय. याआधीही सोशल मीडियाद्वारे समोर आलेल्या काही व्हिडिओमध्ये खाण्या-पिण्यासाठी थांबलेल्या लोकांना रोखण्यात आल्याचं आणि दंड ठोठावल्याचं दिसतंय. तसंच अनेक ठिकाणी लॉकडाऊन दरम्यान कोविड नियमांच्या उल्लंघनासाठी पोलीस नागरिकांना रस्त्यावरच शिक्षा देत असल्याचंही अनेक व्हिडिओंतून समोर आलं होतं. ३० मार्च रोजी आरोग्य मंत्रालयानंकडून कोविड नियमांचं उल्लंघनाची समोर आल्यास कायद्यानुसार त्यांना दंड ठोठवण्याचं तसंच नागरिकांनी नियमांचं पालन करत मास्क परिधान करण्याचं आवाहन करण्यात आलं होतं.
