रोम: करोना संसर्गाला अटकाव करण्यासाठी अनेक देशांमध्ये लसीकरण सुरू आहे. या लसीकरण मोहिमेत ऑक्सफर्ड-एस्ट्राजेनकाच्या लशीचा वापर मोठ्या प्रमाणावर केला जात आहे. मात्र, या लशीचा आणि मेंदूत रक्ताची गाठ तयार होण्याचा संबंध असल्याचे 'युरोपीयन मेडिसिन एजन्सी'च्या एका वरिष्ठ अधिकाऱ्याने म्हटले आहे. युरोपीयन युनियनमधील काही देशांनी याच कारणांमुळे एस्ट्राजेनका लशीचा वापर थांबवला आहे. 'युरोपीयन मेडिसिन एजन्सी'चे अधिकारी असलेल्या मार्को कॅवलेरी एका मुलाखतीत ही बाब स्पष्ट केली. रक्ताची गाठ तयार होणे आणि लसीकरणाचा संबंध आहे, हे ठामपणे म्हणू शकतो. मात्र, नेमकं त्यामागील कारणे काय असतील हे सध्या तरी सांगता येणार नसल्याचे त्यांनी म्हटले. वाचा: एस्ट्राजेनकाच्या लस वापराबाबत 'युरोपीयन मेडिसिन एजन्सी'कडून सध्या तरी कोणतेही निर्देश देण्यात आले नसल्याचे त्यांनी सांगितले. युरोपीयन देशांनी एस्ट्राजेनकाच्या लस वापरावर स्थगिती दिली आहे. वाचा: मार्को कॅवलेरी यांच्या मुलाखतीनंतर एस्ट्राजेनकाकडून कोणतीही प्रतिक्रिया व्यक्त करण्यात आली नाही. लस सुरक्षित असून कोणताही धोका नसल्याचे कंपनीने याआधीच स्पष्ट केले होते. जागतिक आरोग्य संघटनेनेदेखील एस्ट्राजेनकाची लस सुरक्षित असल्याचे म्हटले होते. वाचा: मेंदूत रक्ताची गाठ होण्याच्या कारणांमागे वय, लिंग, आजार आदी कोणता घटक जबाबदार आहे याची माहिती अद्याप समोर आली नाही. त्यामुळे लशीची आणखी समीक्षा करण्याची आवश्यकता असल्याचे मागील आठवड्यात 'युरोपीयन मेडिसिन एजन्सी'ने म्हटले होते. येत्या काही दिवसांत याबाबतची आणखी माहिती 'युरोपीयन मेडिसिन एजन्सी'कडून समोर येणे अपेक्षित आहे. दरम्यान, ब्रिटनच्या मेडिसिन अॅण्ड हेल्थकेअर प्रॉडक्ट्स रेग्युलेटरी एजन्सीने सांगितले की, २४ मार्चपर्यंत लस घेतल्यानंतर रक्ताची गाठ तयार झाल्याचे ३० प्रकरणे समोर आली. त्यापैकी सात जणांचा मृत्यू झाला आहे. ब्रिटनमध्ये १.८१ कोटी डोस देण्यात आले आहेत. त्यापैकी ३० प्रकरणे समोर आली आहेत.
