चेन्नई: आयपीएलच्या १४व्या हंगामाला उद्यापासून सुरूवात होत आहे. स्पर्धेतील पहिली लढत गतविजेते मुंबई इंडियन्स आणि () यांच्यात होत आहे. करोनाच्या वाढत्या रुग्णांची संख्या आणि आयपीएलशी संबंधित अनेकांना याची लागण झाल्यानंतर देखील स्पर्धा आयोजित केली जाणार आहे. मुंबई आणि बेंगळुरू या दोन्ही संघात करोनाचा शिरकाव झालाय. अशात उद्या होणाऱ्या पहिल्या सामन्यावर सर्वांचे खास लक्ष असेल. जगातील सर्वात लोकप्रिय स्पर्धेसाठी चाहते देखील उत्सुक आहे. या वर्षी विराट कोहलीच्या संघाला एक नवा चाहता मिळाला आहे. या चाहत्यामुळे आरसीबीला नवा बुस्टर मिळणार आहे. वाचा- जगातील सर्वात वेगवान धावपटू जमैकाचा माजी खेळाडू उसेन बोल्ट(usain bolts ) ने या वर्षी विराटच्या नेतृत्वाखाली खेळणाऱ्या बेंगळुरू संघाला पाठिंबा देण्याचे ठरवले आहे. बोल्टने RCBची जर्सी घातलेला फोटो सोशल मीडियावर शेअर केला आहे. पहिल्या लढती आधी बोल्टने त्याच्या सोशल मीडियावर हा फोटो शेअर केला असून त्यात त्याने आणि एबी डिव्हिलियर्स यांना टॅग केले आहे. तो म्हणतो, चॅलेंजर्स, मी तुम्हाला इतकेच सांगू इच्छितो की मी आज देखील सर्वात वेगवान धावपटू आहे. बोल्टच्या या ट्विटवर विराट कोहलीने प्रतिक्रिया दिली आहे. यात कोणतीही शंका नाही. यामुळेच आम्ही तुला आमच्या संघात घेतले आहे. आरसीबीला अद्याप एकदाही आयपीएलचे विजेतेपद मिळवला आले नाही. या वर्षी विराट आणि आरसीबीचा प्रयत्न पहिल्या विजेतेपदासाठी असेल. एबीने देखील बोल्टच्या फोटोवर प्रतिक्रिया दिली आहे. आम्हाला जेव्हा अतिरिक्त धावांची गरज असेल तेव्हा कोणाला बोलवायचे हे माहिती आहे, असे एबीने म्हटले आहे. या वर्षी आरसीबीने ऑस्ट्रेलियाचा स्फोटक फलंदाज ग्लेन मॅक्सवेल याला संघात घेतले आहे. या शिवाय संघात सलामीवीर देवदत्त पडिक्कल देखील आहे.
