तेल अविव: इस्रायल आणि पॅलेस्टाइनमधील संघर्ष आणखी चिघळला आहे. इस्रायल आणि पॅलेस्टाइनमध्ये रॉकेट हल्ले सुरू आहेत. पॅलेस्टाइनच्या गाझा पट्टी शहरात इस्रायलने केलेल्या हल्ल्यात सशस्त्र गट हमासला मोठा धक्का बसला आहे. इस्रायलच्या कारवाईत हमासचे ११ कमांडर ठार झाले आहेत. तर, पॅलेस्टाइनचे ७० जण ठार झाले असल्याचे म्हटले जात आहे. तर, इस्रायलने आपले सहा नागरिक ठार झाले असल्याचे म्हटले आहे. या दरम्यान संयुक्त राष्ट्र संघाने युद्ध सुरू होण्याची भीती व्यक्त केली आहे. हमासकडून होणाऱ्या रॉकेट हल्ल्यांच्या प्रत्युत्तरात इस्रायलकडून लढाऊ विमानांद्वारे एअर स्ट्राइक केला जात आहे. इस्रायलने बुधवारी केलेल्या हवाई हल्ल्यात गाझा शहरातील एक बहुमजली इमारत जमिनदोस्त केली. यामुळे दोन्ही देशांतील संघर्ष आणखी भडकू शकतो. वाचा: गाझातील आरोग्य मंत्रालयाने दिलेल्या माहितीनुसार, इस्रायलसोबत सुरू झालेल्या संघर्षात आतापर्यंत ७० ठार झाले आहेत. त्यामध्ये १६ मुलांचा समावेश आहे. तर, ३०० हून अधिक गंभीर जखमी आहेत. इस्रायली सैन्याने दिलेल्या माहितीनुसार, हमासने १५०० रॉकेट डागले आहेत. इस्रायलने केलेल्या कारवाईत ११ कमांडर ठार झाले आहेत. तर, एक इस्रायली जवान ठार झाला आहे. वाचा: वादाची सुरुवात का झाली? इस्रायल आणि पॅलेस्टाईन यांच्यातील वाद नवा नाही. पण नुकताच सुरू झालेला वाद हा रमजान महिन्यातील आहे. मक्का आणि मदिना नंतर मुस्लीम धर्मातील तिसरं प्रसिद्ध धार्मिक स्थळ म्हणून जेरुस्लेममधील अल अक्साची ओळख आहे. या मशिदीत नमाज सुरू असताना पोलीस जमाव पांगवण्यासाठी गेले. पण याचवेळी झटापट झाली आणि संघर्ष पेटला. हा वाद पुढे चांगलाच चिघळला आहे. अल अक्सावरील हल्ल्याला उत्तर म्हणून हमासने रॉकेट हल्ला सुरू केला, त्याला इस्रायलनेही प्रत्युत्तर दिलं आणि हा वाद पेटला.
