मुंबई : बड्या कोर्पोरेट्सच्या आर्थिक निकालांकडे डोळे लावून बसलेल्या गुंतवणूकदारांनी आज सकाळीच खरेदीचा सपाटा लावला आहे. आज सोमवारी बाजार उघडताच सेन्सेक्सने ३०० अंकांची झेप घेतली. निफ्टी ९० अंकांनी वधारला आहे. आजच्या सत्रात गुंतवणूकदारांनी एफएमसीजी आणि बँकिंग क्षेत्रात खरेदीचा ओघ सुरु ठेवला आहे. तर फार्मा कंपन्या आणि मेटल कंपन्यांच्या शेअरवर विक्रीचा दबाव आहे.निफ्टीवर इंडसइंड बँक, एसबीआय, आयसीआयसीआय बँक, अदानी पोर्ट या शेअरमध्ये वाढ झाली आहे. तर एल अँड टी, सिप्ला, भारती एअरटेल, एनटीपीसी आणि टायटन या शेअरमध्ये घसरण झाली आहे. बाजाराला सध्या आर्थिक आकडेवारीबाबत उत्सुकता आहे. देशातील करोना रुग्णसंख्येकडे देखील गुंतवणूकदारांचे लक्ष आहे. त्याशिवाय अमेरिकेतील महागाई, रोजगार आकडेवारी आणि फेडरल रिझर्व्हचे पतधोरण यावरून बाजाराची पुढील दिशा ठरेल असे मत जिओजित फायनान्शिअल सर्व्हिसेसचे शेअर बाजार विश्लेषक व्ही. के. विजयकुमार यांनी सांगितले. सध्या मुंबई शेअर बाजाराचा सेन्सेक्स ३४३ अंकांनी वधारला असून तो ४९०९३ अंकावर आहे. तर राष्ट्रीय शेअर बाजाराचा निफ्टी १०७ अंकांनी वधारला असून तो १४७८५ अंकावर ट्रेड करत आहे. आज भारती एअरटेल, ग्लॅन्ड फार्मा, कोलगेट पामोलिव्ह, फेडरल बँक, वॅबको इंडिया , थ्रीआय इन्फोटेक या कंपन्यांची आर्थिक आकडेवारी जाहीर होणार आहे. शेअर बाजाराच्या आकडेवारीनुसार शुक्रवारी परदेशी संस्थात्मक गुंतवणूकदारांनी बाजारात २६०८ कोटींची विक्री केली. तर स्थानिक संस्थात्मक गुंतवणूकदारांनी ६१३ कोटींचे शेअर खरेदी केले. गेल्या दोन आठवड्यात भांडवली बाजारात झालेल्या पडझडीत परदेशी संस्थात्मक गुंतवणूकदारांनी मोठ्या प्रमाणात गुंतवणुऊक काढून घेतल्याचे समोर आले आहे. मे महिन्यात आतापर्यंत परदेशी संस्थात्मक गुंतवणूकदारांनी ६४२७ कोटी काढून घेतले आहेत. दरम्यान, आज आशियातील भांडवली बाजारात संमिश्र वातावरण दिसून आले. जपान, हाँगकाँग, शांघाई आणि ऑस्ट्र्रेलियातील शेअर निर्देशांकात वाढ झाली. शुक्रवारी अमेरिकेतील तिन्ही प्रमुख भांडवली बाजार तेजीसह बंद झाले होते.
