औरंगाबादः करोना प्रतिबंधित लसींचा तुटवड्यामुळं अनेक जिल्ह्यात लसीकरण मोहिम रखडली आहे. लसींच्या पुरवठा होत नसल्यानं ज्येष्ठ नागरिकांची लस केंद्रावर मोठ्या प्रमाणात गर्दी होत आहे. तसंच, दुसऱ्या डोससाठी नोंदणी केलेल्या नागरिकांनाही लसीसाठी प्रतिक्षा करावी लागत आहे. असं असतानाच औरंगाबादमधील जालन्यात एक धक्कादायक प्रकार उघडकीस आला आहे. लसीकरणासाठी आलेल्या एका वृद्ध नागरिकांला करोना लसीवरील दोन वेगवेगळे डोस देण्यात आले आहेत. जालन्यातील एका आजोबांना लसीचा पहिला डोस कोव्हॅक्सिनचा देण्यात आला होता तर दुसरा डोस कोविशिल्डचा देण्यात आला आहे. या घटनेनंतर या आजोबांना थोडासा त्रास जाणवत असल्याचं नातेवाईकांचं म्हणणं आहे. तर, आरोग्यमंत्री राजेश टोपे यांच्या गावातच असा प्रकार घडल्यानं अधिकारी रडारवर आले आहेत. पहिला डोस कोव्हॅक्सिनचा व दुसरा कोविशिल्डचा जालना जिल्ह्यातील खांडवा गावातील रहिवाशी असेलेल दत्तात्रेय वाघमारे यांनी २२ मार्च रोजी पर्तूर येथील ग्रामीण रुग्णालयात कोव्हॅकेसिनचा पहिला डोस घेतला होता. तर, ३० एप्रिल रोजी एका प्राथमिक आरोग्य केंद्रात त्यांना कोविशिल्डचा दुसरा डोस देण्यात आला आहे. आजोबांना ताप व थकवा लसीचा दुसरा डोस घेतल्यानंतर आजोबांच्या शरीरावर चट्टे उठले आहेत तसंच, हलका ताप व थकवा जाणवत असल्याची माहिती, वाघमारे यांचा मुलगा दिगंबर यांनी दिली आहे. अधिकाऱ्यांवर हलगर्जीपणाचा आरोप वाघमारे यांच्या कुटुंबीयांनी आरोग्य अधिकाऱ्यांनी या बद्दल माहिती दिल्यानंतर डॉक्टरांच्या एका टीमनं वाघमारे यांची तपासणी केली आहे. तसंच, वाघमारे यांना हृदयविकाराचा त्रास आहे त्यांच्यावर काही वर्षांपूर्वीच बायपास सर्जरी झाली आहे. त्यांचं व त्यांच्या मुलाच शिक्षणही कमी झालं आहे. त्यामुळं लसीकरण केंद्रात उपस्थित असलेल्या अधिकाऱ्यांची जबाबदारी आहे की त्यांनी लस देताना योग्य खबरदारी घेणं आवश्यक आहे, असं वाघमारे यांचा मुलगा दिगंबर यांनी म्हटलं आहे. औरंगाबाद विभागाचे आरोग्य अधिकारी स्वप्निल लाले यांनी या घटनेची चौकशी करण्याचे आदेश दिले आहेत. जालना आरोग्य विभागाकडून या प्रकरणी सविस्तर अहवाल मागवला असून वाघमारे यांची प्रकृती स्थिर आहे. त्यांना आता कोणताही त्रास जाणवत नाही, अशी माहिती त्यांनी दिली आहे.
