मुंबई : शेअर बाजारात आज शुक्रवारी सकाळच्या सत्रात गुंतवणूकदारांनी जोरदार खरेदी केली आहे. सेन्सेक्स आणि निफ्टीने पुन्हा तेजीची वाट धरली आहे. सध्या सेन्सेक्स २५० अंकांनी वधारला आहे. राष्ट्रीय शेअर बाजाराचा निफ्टी ८० अंकांनी वधारला असून तो १५८०० अंकांवर गेला आहे. दोन्ही निर्देशांकांनी नवा रेकॉर्ड स्तर गाठला आहे. आजच्या सत्रात आयटी सेवा, बँका, मेटल या क्षेत्रातील शेअरला मागणी आहे. सेन्सेक्समधील ३० पैकी २५ शेअर तेजीत आहेत. ज्यात पॉवररग्रीड, रिलायन्स इंडस्ट्रीज, ओएनजीसी, महिंद्रा अँड महिंद्रा, एचडीएफसी बँक, मारुती , एचसीएल टेक, एसबीआय, एल अँड टी, टीसीएस, नेस्ले या शेअरमध्ये वाढ झाली आहे. बजाज फायनान्स, एचयूएल, टायटन, टेक महिंद्रा, बजाज फिनसर्व्ह या शेअरला विक्रीचा फटका बसला आहे. बँकिंग क्षेत्रात डिसीबी बँक, बंधन बँक, येस बँक, आयडीएफसी बँक, एचडीएफसी बँक, आरबीएल बँक, इंडसइंड बँक, फेडरल बँक, कोटक महिंद्रा बँक, आयसीआयसीआय बँक या शेअरमध्ये वाढ झाली आहे. मेटल क्षेत्रात सेल, जिंदाल स्टील, टाटा स्टील, जेएसडब्ल्यू स्टील, जिंदाल सॉ , टाटा स्टील, वेलस्पन कॉर्प या शेअरमध्ये वाढ झाली आहे. सध्या सेन्सेक्सने २८७ अंकांची झेप घेतली असून तो ५२५८७ अंकांच्या विक्रमी पातळीवर आहे. राष्ट्रीय शेअर बाजाराच्या निफ्टीने ८० अंकांनी वधारला असून तो १५८१५ अंकावर आहे. देशात मॉन्सूनने दमदार एंट्री घेतली आहे. यंदाच्या हंगामाची सुरुवात चांगली झाल्याने कृषी क्षेत्राला फायदा होणार आहे. त्याचबरोबर करोनाचा आलेख झपाट्याने खाली आला आहे. दुसऱ्या बाजूला करोना रोखण्यासाठी लसीकरण मोहीम वेगाने सुरु आहे. या घडामोडी देशांतर्गत आणि परदेशी संस्थात्मक गुंतवणूकदारांना बाजारात गुंतवणूक वाढवण्यास पोषक ठरल्या असल्याचे शेअर दलालांचे म्हणणे आहे. कंपनीने मे महिन्यातील उत्पादन मागील वर्षाच्या तुलनेत जास्त असल्याचे कळविल्यानंतर जेएसडब्ल्यू स्टीलच्या स्टॉकमध्ये गुरुवारी जवळपास ३ टक्के वाढ झाली होती. मागील तिमाहीच्या तुलनेत कंपनीच्या निव्वळ नफ्यात २८.३ टक्क्यांनी वाढ झाली आणि या पाठोपाठ गेलच्या स्टॉक मध्ये २ टक्क्यांनी वाढ झाली. मार्च २०२१ रोजी संपलेल्या तिमाहीत कंपनीने निकृष्ट संख्येचा अहवाल दिला असूनही बाटा इंडियाच्या स्टॉकमध्ये ५ टक्क्यांहून अधिक वाढ झाली आहे. अमेरिकेतील सकारात्मक संकेतानंतर आज आशियातील सर्वच प्रमुख दिसून आली आहे. जपानचा निक्केई स्थिर आहे. चीनचा शांघाई निर्देशांकाने वाढ नोंदवली आहे. हाँग काँग आणि सिंगापूरमध्ये वाढ झाली.
