मुंबई : सरत्या आठवड्यात आणि चांदीच्या किमतीत मोठी घसरण झाली आहे. आठवड्याच्या शेवटच्या सत्रात सोने ३०० रुपयांनी स्वस्त झाले. सोन्याचा भाव ४९००० खाली स्थिरावला. गेल्या काही महिन्यात सोन्यामध्ये होत असलेल्या घसरणीनंतर सोने सार्वकालीन उच्चांकी स्तरापासून ७५०० रुपयांनी स्वस्त झाले आहे. करोना संकटाच्या पहिल्या लाटेत सोन्याने विक्रमी दौड घेतली होती. जागतिक कमॉडिटी बाजारात सोन्याचा भाव प्रती औंस १९०० डॉलरवर गेला होता. तर देशांतर्गत बाजारात सोन्याने ५६३०० रुपये इतका विक्रमी पातळीवर गेला होता. आज मात्र सोने ४८८०० रुपयांपर्यंत खाली आले आहे. मल्टी कमॉडिटी एक्सचेंजमध्ये शुक्रवारी सोन्याचा भाव ४८८८० रुपयांवर स्थिरावला. त्यात ३१८ रुपयांची घसरण झाली. सोन्यामध्ये घसरण होत असली तर दुसऱ्या बाजूला चांदीमध्ये तेजी दिसून आली. बाजार बंद होताना एक किलो चांदीचा भाव ७२२१६ रुपयांवर स्थिरावला. त्यात २१७ रुपयांची वाढ झाली होती. त्याआधी गुरुवारच्या सत्रात सोन्यामध्ये २५० रुपयांची घसरण झाली होती. Goodreturns या वेबसाईटनुसार आज रविवारी मुंबईत २२ कॅरेट सोन्याचा भाव ४७७३० रुपये आहे. मुंबईत २४ कॅरेटचा भाव ४८७३० रुपये आहे. दिल्लीत आजचा २२ कॅरेट सोन्याचा भाव ४७८९० रुपये झाला आहे. २४ कॅरेटसाठी सोन्याचा भाव ५२१९० रुपये झाला आहे. आज चेन्नईत २२ कॅरेटसाठी ४६०६० रुपये तर २४ कॅरेट सोन्याचा भाव ५०२४० रुपये आहे. कोलकात्यात आज २२ कॅरेट सोन्याचा भाव ४८४९० रुपये असून २४ कॅरेट सोन्याचा भाव ५११९० रुपये आहे. दरम्यान, सोन्यामध्ये घसरण होत असल्याने त्यावर दबाव निर्माण झाला आहे. ग्राहकांमध्ये देखील सोन खरेदी करावं कि नाही याबाबत संभ्रम आहे. याबाबत कमॉडिटी विश्लेषक मात्र सकारात्मक आहेत. नजीकच्या काळात सोनाच्या किमतीत वृद्धी होईल, असा अंदाज वर्तवला जात आहे. डिसेंबरअखेर सोने पुन्हा उसळी घेईल असा अंदाज आहे. सोन्याचा भाव या वर्षाअखेर ५३५०० रुपयांपर्यंत वाढू शकतो, अशी शक्यता काही जाणकारांनी व्यक्त केली आहे.
