म. टा. विशेष प्रतिनिधी, मुंबईत करोनाचा प्रादुर्भाव सुरू झाला आणि प्रतिबंधित क्षेत्रांनी एकेक परिसर व्यापण्यास सुरुवात केली. तीच गत परिसरातही निर्माण झाली होती. पण, आता नियंत्रणात येत असताना, झोपडपट्टी परिसरातील प्रतिबंधित क्षेत्रे कमी होत आहेत. सध्या पालिकेच्या नोंदीनुसार शहरातील २४पैकी १८ विभागांतील झोपडपट्टी भागात एकही प्रतिबंधित क्षेत्र उरलेले नाही. करोनाच्या पहिल्या लाटेत करोनाचे सगळ्यात जास्त संकट झोपडपट्टी भागांत आढळले होते. पण, दुसऱ्या लाटेत झोपडपट्टी भागात करोना संकट कमी झाले आहे. पालिकेच्या २४पैकी १८ विभागांतील झोपडपट्टी परिसरात एकही प्रतिबंधित क्षेत्र उरलेले नाही, तर उर्वरित सहा विभागांमध्ये २२ प्रतिबंधित क्षेत्रे आहेत. करोनाच्या दुसऱ्या लाटेत उच्चभ्रू वसाहती आणि इमारती भागांपेक्षा झोपडपट्टीमध्ये करोनाचा अंमल कमी जाणवला आहे. पश्चिम उपनगरात नियंत्रणात यापूर्वी पश्चिम उपनगरातील अंधेरी पश्चिम, गोरेगाव, मालाड, बोरिवली, दहिसर या भागांतील झोपडपट्ट्यांत करोनाचा संसर्ग मोठ्या प्रमाणावर जाणवला होता. मात्र, सध्या तिथे एकही प्रतिबंधित क्षेत्र उरलेले नाही. त्याचप्रमाणे इतर विभागांचा आढावा घेतल्यास धारावीसह घाटकोपर, वांद्रे, घाटकोपर, परळ, अंधेरी पूर्व आदी विभागांतही असेच चित्र आहे. प्रादुर्भाव असलेले झोपडपट्टी विभाग - अंधेरी पूर्व - ८ - कांदिवली - ६ - भांडूप - ३ - मुलुंड - २ - चेंबूर एम - २ - भायखळा - १
